Aruba presente den reunion di OAS riba situacion Venezuela

WASHINGTON – Aruba tabata presente den e reunion di Organisacion di Estadonan Americano (OAS) riba e situacion di Venezuela diabierna. Minister plenipotenciario pa Aruba na Washington a presencia e reunion aki, y a papia cu e.o. e Secretario General di OAS Luis Almagro. 

IMPLICACION

Embahador di Hulanda na Washington Hene  Schuwer a splica cu aunque Reino Hulandes no ta un miembro permanente di OAS y aunke Hulanda mes ta leu di Sur y Norte Merca, cu OAS ta hopi importante pa Reino Hulandes paso Aruba, Corsow, St. Maarten y e islanan BES si ta logisticamente cerca y pa tal motibo e la reitera cu Reino Hulandes como observador den OAS lo sigui contribui y yuda unda e por.

VENEZUELA

A papia over di e situacion na Venezuela y e hecho cu e miembronan di OAS hunto cu e grupo di Lima a rechasa e inauguracion di Presidente Maduro. Tambe a papia over di e situacion na Nicaragua cu ta trece cu n’e su problemanan den Latino America.

HIGHLIGHT

E highlight di e reunion tawata e firmamento di un contribucion di USD 1.000.000,00 cu Hulanda lo yuda OAS cu ne pa e proyecto di control electoral. Embahador Schuwer a splica cu democracia ta wordo sirbi dor di eleccionnan transparente, democratico y inclusivo y cu OAS a bin ta haci un bon trabou den ta presente na varios eleccion pa controla cu tur cos ta cana debidamente. 

OBSERVADOR

Aunke Reino Hulandes no ta un miembro permanente di OAS e ta presente na tur reunion como observador. Joselin mes a asisti na dos di nan reunionnan caba y ta splica cu e networking ta hopi bon pasobra eynan bo ta topa hopi lider y of embahador di paisnan Latino Americano of Caribense y bo ta haya chens pa tende kico cada uno ta pasando aden y kico ta e impacto cu e por tin riba Aruba. Tambe OAS tin varios departamento cu ta cay bou di dje manera CICAD cu tin proyecto andando pa cu proteccion di frontera, guera contra droga y armanan ilegal. Asina tin otro departamentonan cu ta traha riba innovacion y agricultura pa e paisnan Latino Americano y Islanan den Caribe. Por ehempel CICAD a yuda Jamaica cu restructuracion di nan prison y a bin cu un bon proyecto con pa yuda e hobennan reeintegra den comunidad. Aunke Aruba no ta miembro, nos por participa den e proyectonan aki pa un contribucion chikito na CICAD.