Knops: Aruba a bay di acuerdo cu candidatura Henk Kamp

ORANJESTAD – Secretario di Estado Hulandes pa Asuntonan di Reino Raymond Knops a keda sorprendi cu Aruba tabata contra candidatura di Henk Kamp como representante pa Hulanda den e colegio di supervision financiero, tabata decision di Conseho di Minister di Reino Hulandes. Asina el a bisa NoticiaCla diahuebs.  “Mi por bisa solamente cu RMR a haci e nombracion aki” Knops a bisa, pero no tabata dispuesto pa comparti mas informacion. Interesante ta cu e (Knops) a bisa di no tabata sa cu Aruba tabata contra. “Bo informacion ta sorprendemi” tabata su contesta. E portal aki a record’e cu premier di Aruba Wever Croes a confirma cu Aruba a protesta contra e nombracion aki, y cu e tabata un violacion di e ley di LAFT. 

TUR HENDE TABATA DI ACUERDO

Riba e parti di violacion di ley, Knops a bisa cu ‘si tur hende ta di acuerdo, e ora por palabra cu den e caso aki por haci un excepcion’. Ora cu e portal aki a confront’e cu e informacion cu Aruba tabata contra, Knops a reacciona di e siguiente manera :”Bo ta bisami cos cu ta echt sorprendemi cu bo ta bisando. Mi no ta bay reacciona riba esey ”Knops a sigui bisa rapidamente. Ora cu a puntra e mandatario ki parti e ta sorprendi, Knops a bisa “E parti cu Aruba tabata contra. E kier men cu e tabata den e reunion di RMR unda cu Aruba lo a bay di acuerdo. “Pero mi no por bisa nada di esey. Mi no por bisa ken (tur) a tuma cua posicion. Pero abo ta sigura algo, cu mi no por refuta”. E motibo ta secrecia di reunion di RMR. 

ARUBA SU PUNTO

Tabata luna pasa ainda cu NoticiaCla a confronta prome minister Wever cu e informacion aki y unda cu e mandatario a clarifica su punto pa e portal aki. “Bo ta mira cu Hulanda ta midi cu dos midi, y especialmente cu ta un otro gobierno”.  Wever Croes na comienso di December aña pasa durante un conferencia di prensa. Wever a confirma e biaha ey tambe cu Gobierno di Aruba a opone. E pregunta a surgi despues cu recientemente un parlamentario di e partido di Wever (MEP) esta Endy Croes a lansa e critica den direccion di e miembro di CAFT aki, Henk Kamp, cu e tin cu retira pasobra e ta nombra contra ley. E ley ta stipula cu un miembro di CAFT no por tabata riba lista di un partido de pasado of presente. Y Kamp tabata miembro di VVD di Hulanda y minister.  

OPONE

“Nos a opone. Nos a duna e comentario cu e ta contra di ley” Wever a bisa e portal aki. De hecho, gobierno a bisa cu e ley full e tempo ey den oposicion, Wever tabata contra. “Dia cu e ley a bin Parlamento, ora cu gobierno di AVP a bin cune, nan no tabatin e excepcion pa politiconan of ex politiconan den e ley” Wever a sigui bisa. Segun e prome mandatario, ta durante tratamento di presupuesto, parlamentarionan di AVP a lanta bisa cu nan kier evita cu hendenan manera Nilo Swaen, Nel Oduber, ex politiconan drenta den CAFT. 

AMIENDA 

“Anto nan a haci e cambio ey cu tabata dun amienda di parlamento durante reunion, sin consulta cu Hulanda. Pasobra e momento ey Sybilla Dekker (predecessor di Kamp) tabata miembro di Caft y sra Dekker tabata un minister den pasado” Wever a continua. Pues e tempo ey Wever cu tabata den oposicion (hunto cu varios e tempo ey awe ta den gobierno) a bisa cu e ta un cambio nobo y cu ‘zoiezo’ no ta comparti full e ley. Wever ta haya tur esaki weganan politico di e tempo ey di AVP. Hulanda sinembargo, segun Wever, a acepte, pero esey tabata nan responsabilidad. “Pero ora cu na mei Henk Kamp a wordo proponi door di Hulanda, mi a bisa Hulanda, bo ta violando ley. Cu esaki bo ta violando ley flagrantemente” Wever a sigui bisa. Acerca, Wever a bisa e portal aki cu e ley ta inconstitucional y e ley no ta corecto y tin pensa di cambia esaki. “Pero ey bo ta mira cu Hulanda ta midi cu dos midi, y especialmente cu ta un otro gobierno. Cu e gobierno aki, e midinan ta hopi mas skerpi. Bo ta sinti’e hopi mas skerpi riba e liniaal” Wever a finalisa bisando. Scucha e declaracion di Knops na Noticiacla AKI.