Mayornan ta sigui preocupa cu validez di diploma HAVO/VWO

ORANJESTAD – Mayornan di alumnonan di Colegio Arubano ta sigui precupa riba e validez di rapport di nan yiunan aki dos aña. Pa informa nan mes miho nan a tene un encuentro caba y a caba anuncia un di dos encuentro, cu e fin pa haya mas informacion riba e materia aki. Mientrastanto e debate entre Hulanda y Aruba ta continua riba e tema aki. NoticiaCla.com a compronde cu e instancia di Hulanda, lo ta na Aruba proximamente pa toca e tema aki tambe.

NoticiaCla.com mientrastanto a ricibi e copia di e invitacion di e carta pa mayornan, pa e di dos reunion. Aki nan ta gradici tur mayor cu a presencia reunion di Comision di Mayor OCCA, dia 15 di October ultimo. Segun e mayornan, durante e reunion aki a resulta cu validez di diplomanan di HAVO y VWO na Hulanda ta un topico importante. “ Ta existi un preocupacion grandi cu aki dos aña e diplomanan di HAVO y VWO lo no tin e mesun valor cu esunnan di Hulanda, si no acelera e accionnan necesario”, e carta ta bisa. “ Pa e motibo aki a dicidi pa riba termino cortico tene un siguiente encuentro, caminda rector di Colegio y un representante di SMOA lo duna mas informacion riba e topico ariba menciona. Nos ta invita bo gustosamente pa e encuentro aki riba dia 27 di october proximo pa 8pm den sala di maestro di Colegio”. Segun e carta, e informacion cu e mayornan lo ricibi durante e encuentro lo duna nan un mihor bista di e materia. “ Cu esaki nos lo por determina na ki manera, nos como mayor lo por urgi esnan responsabel pa acelera e accionnan necesario pa yega na un diploma ekivalente na diplomanan di Hulanda”. Tambe e mayornan ta bisa cu pa nan haya oido, nan tin mester di e sosten y apoyo di mas tanto mayor posibel. “Nos ta spera di por conta cu presencia di tur mayor dia 27 di October pa 8 or di anochi. Na mes momento nos ta pidi mayor su ayudo pa pasa e mensahe aki pa mas tanto otro mayor”, e carta ta finalisa bisando. (Aki por lesa e carta completo).