Segun Rutte tin confiansa cu tanto gabinete awor como esun anterior

ORANJESTAD – E confiansa di Hulanda den gobierno anterior di Aruba no tabata malo. Esey por compronde di prome minister Hulandes Mark Rutte su contesta e siman aki riba un pregunta di NoticiaCla. Mientras cu el a confirma cu e tin confiansa den e gobierno aki, el a sigura NoticiaCla cu e relacion cu e gobierno anterior tambe tabata bon. E pregunta di NoticiaCla tabata basa riba e hecho cu gobierno actual ta sigura cu Hulanda no tabatin confiansa den e gobierno anterior. Segun premier di Aruba Evelyn Wever, na Hulanda el a wordo bisa den su cara cu gobierno no tabatin confiansa den Aruba. Den su fabor, tin e ehempel cu ainda gobierno Hulandes no a yuda Aruba cu e ‘zachte lening’, ‘pa motibo di e falta di confiansa’. 

PROBLEMA  CU HULANDA

Rutte a splica e siman aki mesora si cu e hecho cu e ta bisa cu tin confiansa den e gobierno aki, no kier men cu no por tin problema. “Esey no kier men cu esey kier meen cu esey e problemanan ta resolve” Rutte a sigui bisa. “Confiansa tey”, e mandatario Hulandes a sigui contesta. Pero cu tin cu traha si riba e problemanan cu tin, particularmente saneamento di e situacion financiero. 

GOBIERNO ANTERIOR

E portal aki a puntra Rutte e ora, (basa riba declaracion di premier di Aruba Evelyn Wever Croes) si su relacion cu gobierno anterior tabata malo, manera Wever ta bisa, Rutte a desmenti. “Cu Mike Eman tambe mi a traha hopi bon durante e 7 añanan cu mi a traha cu ne” e mandatario Hulandes a bisa. 

DIFERENCIA DI OPINION

Loke a resalta di e contesta di Rutte, ta cu un bon relacion no kier men cu tin asuntonan cu mester di atencion. Cu esaki e kier men cu tanto cu Wever como den pasado cu (Mike) Eman. “Nos a yega di bisa otro precies kico nos no tabata gusta di otro, y kico nos tabata pensa di otro, pero esey mester ta posibel tambe” Rutte a bisa di e relaciona anterior. De hecho, el a bisa cu e ta sigur cu e lo haya esey tambe cu Wever, esta cu nan lo diferencia di opinion cu otro. “Esey no a sosode ainda, pero e lo sosode un biaha si”. Segun Rutte, esey mester ta posibel den un bon relacion. Si Wever ta rabia riba dje, e ta spera cu Wever coi telefon y bise directamente. Segun Rutte,  por tin diferencia di opinion riba cierto tema, unda cu ta deal cu ne, pero no cu e relacion no tin confiansa y cu e lo ta malo. Ni cu e gobierno aki, ni cu esun anterior. Wever den su contesta pa NoticiaCla, ta diferencia di opinion. 

RELACION PORFIN BON 

Wever diahuebs mainta den conferencia a bisa cu cos ta un poco diferente, segun su interpretacion. Y pa mustra su punto, Wever a referi na su bishita di  mei aña pasa na Hulanda, unda cu e palabra confiansa  tabata un liña cora di tur su combersacionan. “Ami no a tend’e bisa cu nunca e no a perde confiansa.  Ami a tende bisa cu e tin confiansa aworakinan” Wever a sigui bisa NoticiaCla. “Atrobe, mi ta cauteloso. Ami sa cu nan a bisami den mi cara (na Hulanda), cu no tin confiansa den gobierno di Aruba, y nos tin cu demostra (esaki ) prome”. A mustra como ehempel pues cu esey ta e motibo cu nos (lesa Aruba:red) no por haya un ‘zachte lening’ prome di Hulanda. 

ZACHTE LENING

E zachte lening cu Wever ta referi na dje ta e acuerdo di diahuebs santo di 2013, unda cu Hulanda a bay di acuerdo pa yuda Aruba cu un fiansa ‘suave’ esta cu interes abou. Mientras cu cada bishita di e mandatarionan Hulandes (anteriormente Ronald Plasterk) tabata mustra positivo, yena cu elogio, cada bez. Pero cada bez ora cu NoticiaCla tabata confronta nan cu e punto di e prestamo, e mandatario tabata negativo. “No, nos no ta cla ainda pa duna Aruba e prestamo special ey” Plasterk a bisa NoticiaCla na multiple ocacion. Mientras cu gobierno a cambia, durante e bishita anterior aña pasa tambe, e gobernante actual Knops, a bisa cu Aruba aunke haciendo un bon trabou, no ta cla pa ricibi e prestamo cu condicion special. Esaki ta nifica cu tin confiansa, pero no riba e tereno financiero. Ni cu e gobierno anterior, ni cu e gobierno actual. Por lo menos no te ora cu tin un presupuesto balansa.