Wever: Gobierno no mester haya problema cu CAFT pa motibo di reparatietoeslag

ORANJESTAD –  Gobierno no ta kere cu e lo haya problema cu e colegio di supervision financiero pa Aruba CAFT, pasobra a revoca e medida di kita e reparatietoeslag di 125 pa penshonado. Asina premier Evelyn Wever Croes a bisa NoticiaCla diahuebs durante e conferencia bisemanal di gobierno. E pregunta ta basa riba e hecho cu door di revoca e decision, e 11 miyon cu lo a spaar, no ta bay tey mas, y pues ta bira un suma extra cu gobierno mester haya di un otro caminda. CAFT por interprete como un falta di cumplimento y otro cambio di maneho cu ta afecta e caha financiero. Wever sinembargo, no ta kere esaki. 

PALABRACION 

Segun Wever, e protocol ta haci palabracion riba algun nivel. Un di nan ta gasto, en general. E no ta bay specificamente riba con a gasta cierto sumanan. E decision di e reparatie toeslag, of cualkier otro decision cu wordo tuma, mester wordo bon balancia segun e premier, y por wordo tuma solamente si e ta pas den e cuadro di e protocol cu a cera. Wever a sigura tambe cu gobierno ta teniendo su mes na e protocol encuestion. E ta apenas 3 siman vigente ya cu el a drenta na vigor 1 di januari.