Aruba den estado di alerta pa e situacion na Venezuela

ORANJESTAD – Aruba ta den estado di alerta pa cu e situacion di Venezuela. Asina prome minister di Aruba Evelyn Wever a bisa durante un conferencia di prensa bisemanal di gobierno. Loke mester compronde den esaki, ta entre otro cu e briefing nan a intensifica riba e tema, y ta inclui preparacion pa tur eventualidad. Cu eventualidad, ta compronde e asunto di buelo por bira un issue, vigila e frontera, posibel evacuacion di nos hendenan, y e impacto di cualkier decision cu e actual presidente Maduro por tuma referente nos islanan.

EHEMPEL

Segun Wever, e briefing nan a bira multiple riba un dia, compara cu dos pa dia of pa cada pasa dia. E situacion ta asina volatile y ta cambia asina hopi cu mester ta pendiente awor cada momento. A mustra cu tin preocupacion cu nos frontera, unda cu tin e posiblidad cu Maduro como represaya, por cera e frontera atrobe, incluyendo cierre di e espacio aereo manera cu el a haci den pasado caba.

CIUDADANONAN DI ARUBA

A pidi Arubianonan pa no biaha pa Venezuela si no ta necesario, y si bo dicidi toch di bula pa Venezuela, pa registra bo mes na embahada Hulandes. Esey ta sigura cu bo ta riba e ‘lista’ di e embahada, en caso tin un situacion di evacuacion. No ta nifica cu lo tin un evacuacion, pero toch e posibilidad tey.

RECONOCE PRESIDENTE?

Aruba riba su mes no por declara si ta sostene e president interino apunta Guaido, pasobra e ta keda un tema di Reino Hulandes. Hulanda te cu diahuebs mainta no a informa ki posicion nan ta tuma riba e tema, esta cu Hulanda no a dicidi ainda si ta reconoce e president apunta Guaido. Unabez cu nan dicidi, Aruba lo tin cu wak con esaki ta afecta nos islanan. Por pensa riba represaya contra nos islanan si e noticia ta ‘negativo’. Hulanda ta riba e mesun posicion cu Union Europeo, cu te awor a reconoce Guaido como presidente di Parlamento Venezolano, y e legitimidad di e organo ey. Pero ainda no a bisa si nan ta reconoce Guiado como e presidente legitimo.