Illis: Prueba contra Peasch no ta convincente y mester absolve di tur cargo

ORANJESTAD – No tin nada, pero nada cu Melony Paesch a haci cu ta merece pa e ta un sospechoso den e caso aki, cu yama Ibis. Esaki segun abogado Demis Illis. Diaranson merdia   Illis a tuma e defensa di casa di ex minister Paul Croes na su encargo, unda cu a purba convence huez cu e cargonan di labamento di placa y traficacion di hende no ta cargonan pa cual por culpa su cliente. Como tal a pidi pa declara su cliente liber di ambos cargo. 

TRAFICACION DI HENDEDen caso di traficacion di hende, Illis a sigura cu e persona pa cual ta acusa Paesch di a ‘trafica’, a drenta Aruba legalmente, via nos aeropuerto, cu su pasaporte. “No laga OM tumabo haci. Nada no a keda ‘gefixed’” Illis a purba sigura Huez. Segun Illis, fiscal kier pretende cu Paesch a ‘exploita’ e persona Y. Zapaleta, cual mester ta e base pa por culpa un persona di traficacion di hende. Ademas a mustra cu Zapaleta tabatin un permiso di turista, cu de hecho a keda extendi pa e tempo ey ex minister Benny Sevinger cu tabatin e cartera di permiso na su encargo. A splica tambe cu e persona aki a permanece na Aruba pa un periodo di prueba pa Paesch por a mira si e persona aki ta esun corecto pa cuida e muchanan. Esaki ya cu nan tin mal experiencia cu tres persona anteriormente. Pero aparentemente ley no ta permiti pa un persona pasa un proeftijd ora cu e ta wardando permiso. Di otro banda, e abogado a mustra cu e gobierno anterior tabatin un maneho mas suave riba e tereno aki y a cuminsa pa cambia e maneho pa por acomoda esnan cu ta bin pa cuida mucha. De hecho, a sigura cu un ‘inwonende dienstbode’ e titulo di e persona, por keda warda su tramite di permiso na Aruba y no mester bay su pais bek pa haci tal. 

LABA PLACARiba e cargo aki, di labamento di placa pa cual Paesch ta wordo sospecha tambe (hunto cu su casa), e abogado a pidi absolucion tambe pasobra no tin ningun prueba palpable pa culpa su cliente. Loke cu, segun e abogado, OM a haci ta pone varios cifra y informacion hunto y haci como si fuera e suma menciona ta e suma cu a keda ‘laba’ pa medio di negoshinan di e casa di e ex minister. “Mi cliente no ta compronde pakico e ta aki y pakico e ta wordo culpa di esaki” Illis a bisa repetidamente. Ora cu a bay keha esaki na ministerio publico, el a bin tende pa warda un rato pasobra ora cu nan bin cu e asina yama ‘ontnemingsdossier’, e dossier di confiscacion, tur cos lo wordo ‘clarifica’, esta e motibo pakico ta sospecha Paesch di labamento di placa. Pero ora cu e dossier aki a yega, esaki ‘no a trece e claridad’. Segun abogado Illis, e acusacion ta basa riba calculacionan robez, cu de hecho e cliente mes mester a bay ‘investiga’ pa compronde unda y con nan a yega na cierto cifranan. Ningun momento a specifica cifranan specifico, di unda nan a haya nan, kico a sosode cu nan, manera a haci p.e. cu e caso di galiña horta pa un comerciante hulandes. Den e caso ey si, OM a specifica detayadamente unda y ken a haci pago, na ken y cuanto. Pero den e caso aki, a pone tur cos hunto, y no tin claridad ken a haci kico. Esaki ta haci e cargo, uno hopi debil segun e abogado. Tur esaki segun Illis, ta basa riba mentira di un informante. “Asina mes ta sigui usa e informacion di e informante” Illis a sigui bisa. 

SILK COTTON vs COFFIE TABLE

Un di e negoshinan cu Paesch tin, ta Silk & Cotton, cu segun e abogado, ta un negoshi di paña. Y e productonan cu supuestamente Paesch lo a cumpra, ta pa un otro tipo di negoshi. Y a splica cu pa un periodo e negoshi ey, (Coffie Table) tabata un negoshi di dos socio, unda cu Paesch tabata encarga mas cu e parti di mercadeo, y su socio di fam Raven, tabata encarga cu e operacion incluyendo compra di producto. A trece esaki dilanti, pasobra segun e abogado, fiscal a bruha den e asunto y ta culpa Paesch di a cumpra mercancia cu placa procedente di un actividad criminal. Pero ta mustra cu e no tabata ni envolvi den esaki. Un otro parti unda cu lo a usa placa pa haci compras, Illis a purba clarifica cu ta placa cu el a usa di e credit card di su casa, y cu el a y lo a paga bek. Pues atrobe, ministerio publico a bruha cuenta, cifra y a tira tur cos hunto y wak kico ta keda ‘para’. Finalmente, e abogado a mustra cu nada cu a keda presenta segun OM, ta contundente, corecto y por incrimina su cliente Melony Paesch. Pa e motibo ey, mester declara su cliente liber di tur cargo.