Minister Paul Croes: Doñonan di Rio Grande mester a conserva e edificio

NOORD – “Mi ta lamenta cu nan a basha Rio Grande abou”. Asina Paul Croes, actual minister di gabinete Mike Eman II a reacciona na NoticiaCla.com riba e hecho cu a benta e edificio abou diasabra mainta. Croes tabata hopi serca di e edificio, ya cu e edificio a fungi como centro di su campaña electoral pa dos eleccion. “Ciudadanonan di Noord ta rabia riba e hecho aki , y mi mes tambe” Croes ta sigui bisa.

Croes mes ta repasa su temponan cu e la uza e edificio aki como centro di su campaña. “Un bunita monumento y sigur pami un centro di campaña ya pa dos eleccion caba”. Segun Croes, kizas e doñonan (nobo) por a adapta nan negoshi y conserva e edificio. “Bye Bye Rio Grande… Rio Berde..” Croes ta sigui bisa finalmente.

Mientras cu e mandatario encarga cu monumento, Otmar Oduber, no kier a reacciona oficialmente, e la haci esaki si riba su pagina personal di Facebook. “Esta un berguensa pa mira cu ainda tin hende cu no ta respeta nos monumentonan” Oduber ta cuminsa na bisa. Segun Oduber, historia y herencia cu sin mas ta worde elimina.

Segun Oduber, e desaroyado no tabata honesto tambe ora di presenta su plan. “Anto esaki despues di a "Ganja" e dept. di Monumenten Bureau di lo conserva esaki. Esta un berguensa!” e mandatario ta sigui bisa riba su pagina. Oduber ta sigui bisa cu mester cambia ley awo, paso hasta si ta riba lista di edificionan protegi, e unico castigo ta di 1000 florin. “ Ta cuestion di consenshi, esta si bo tin anto”, Oduber ta sigui bisa. Mester bisa si cu esaki tabata riba su pagina personal, y no ta conoci si esaki ta su opinion como minister si.

E reaccion publico mientrastanto, riba e reaccion di e doñonan nobo, cu a aparece diasabra anochi riba NoticiaCla.com, no ta mucho positivo. Por a nota cu mayoria di nan no ta compronde e reaccion, mientras cu otronan ta considera cu e reaccion di e doñonan nobo, no ta hustifica e loke cu nan a haci. No a logra haya reaccion ainda di e instancianan gubernamental cu e doño ta referi na dje den su reaccion oficial. E foto di archivo ta durante un fundraisingi di e partido, na e sede di Paul Croes, e tempo ey ainda Rio Grande (Rio Berde).