Parke Arikok tin un director nobo

ORANJESTAD  - Parke Arikok tin un director nobo nombra, den persona di  Emil Ter Horst, cu ta reemplaza Diego Marquez, cu algun luna pasa a entrega su retiro, despues di un periodo corto na cabes di e parke. 

 Ter Horst tin amplio experiencia cu e desaroyo di comunidad innovativo y sostenibel, segun e hunta di directiva. Durante su ultimo proyecto e tabata e coordinador internacional di un proyecto extenso di sostenibilidad pa e municipio di Almere, cu tabata envolví seis (6) país y cu tabata valora na mas cu 30 miyon euro. Ter Horst tabata responsabel tambe pa adkiri e subsidio di e Comunidad Europeo pa e proyecto aki cu un montante di 11 miyon euro. Den su trayectoria di “Project Manager “ y “Team Leader”, Sr. Ter Horst tin experiencia tambe cu organisacionnan sin fin lucrativo. Ter Horst, naci na Hulanda, a studia Fisica y Estudionan Ambiental na e Universidad di Utrecht. Emil ter Horst ta bibando na Aruba for di Augustus 2013 y e ta casa cu Yvonne Vanwersch cu ta traha como Huez na corte di prome instancia.

Emil y Yvonne tin dos yiu. Nan yiu homber Kasper ta un medico y nan yiu muhe ta studiando medicina. Tur miembro di famia Ter Horst ta excursionista ferviente y nan a frekuenta Parke Nacional Arikok na hopi ocacion. Su experiencia amplio lo hunga un rol importante den alineacion di e parke cu e vision di desaroyo sostenibel di Gobierno. Su prome mision di corto duracion lo ta pa reforza e fundeshi di e parke su retonan financiero, administrativo y di personal cu e tin actualmente. Unavez cu esakinan ta regla, e lo ta e complemento perfecto hunto cu e expertonan di parke procedente di Merca, U.S. Park Service, den e preparación di e plan di desaroyo strategico di diez aña pa Parke Nacional Arikok. E directiva di Parke Nacional Arikok ta hopi contento cu e caliber di e director nobo y ta desee tur cos bon y ta extende su gratitud na Minister Mike de Meza pa su apoyo cu e logro importante aki pa e parke. Riba e portret cuminsando na bando robes: Glen Thodé, secretario di junta directiva, Minister Mike de Mez, Emil Ter Horst, director, y Greg Peterson, presidente di junta directiva.