Hopi interes pa e defensa di ex minister Paul Croes y su casa mañan

ORANJESTAD – Tin hopi interes pa sigui e parti di defensa di ex mandatario Paul Croes y su señora Melony Paesch diaranson den corte. Manera ta conoci, diamars abogadonan a cuminsa cu nan respectivo defensa den e caso Ibis, despues di dialuna fiscal a caba cu su rekisitorio y a presenta su demanda. Ora cu tanto Croes como Paesch a tende e demanda contra nan, nan tabata basta verbal den nan reaccion. Nan ta para ariba cu nan ta inocente y ta ‘invita tur hende bin tende e defensa’ di nan caso diaranson, pa asina tende nan version di loke a sosode. 

INOCENTE

Comentarionan mientrastanto den comunidad y tambe pafo di Aruba ta riba e hecho cu aunke cu diabierna y prome, fiscal a presenta un sin fin di argumento den nan rekisitorio, di con e ‘machine di ontheffing’, manera cu nan mes a yame ta funciona, cu ainda Croes y Paesch por bisa cu nan ta inocente. Croes a para ariba cu tur loke a keda presenta, ta sea fabrica of ta manipula pa mustra cos diferente cu e ta. A logra esaki segun Croes, door di manipula declaracionan, hinca nan den contexto robez, traduci cos malo y mustra con cos ta bayendo siendo cu no ta asina. Abogadonan di Croes y Paesch, tin un trabou di bay haci pa cambia e ‘imagen’ cu tin aworaki di e caso Ibis, y wak si por convence e huez cu loke nan ta bisa ta e berdad, y no loke fiscal a bisa. Esey a pone cu e interes di tanto prensa como comunidad en general ta hopi grandi pa wak con esaki lo bay desaroya. Diamars corte a trata e defensa di e tramitadornan Filiciana y Nuñez, e persona Schwengle, y e presidente di e fundacion di Croes, Capriles. E caso diaranson (mañan) ta sigui pa 9’or di mainta.