Knops: Protocol cu Hulanda a cera cu Aruba no ta mina e democracia

ORANJESTAD. – Protocol cu Hulanda a cera cu Aruba aña pasa riba situacion financiero, no ta mina e democracia (di Aruba). Mas specifico, e hecho cu Conseho di minister di Reino Hulandes tin e ultimo palabra segun e protocol firma entre Aruba y Hulanda,( lagando Parlamento de hecho afo: red), no ta nifica cu Hulanda ta mina democracia di pais Aruba. Asina secretario di estado Hulandes Raymond Knops a contesta un pregunta di  NoticiaCla diamars durante un conferencia di prensa. De hecho, segun Knops, el a splica cu ta e gobiernonan ta haci palabracion cu otro. Aunke Knops no a bisa despues cu ta Aruba mes a bay di acuerdo cu e punto ey, (esta cu RMR tin ultimo palabra), esey tabata e insinuacion si. “Ta keda na cada gobierno con ta anda cu e acuerdo aki den nan ‘respectivo cas”’. Ademas, segun Knops, e palabracionan haci, ta pa bienestar di Aruba. “Ultimo cos cu nos kier haci, ta mina e democracia (di pais Aruba)” Knops a sigura e portal aki. El a mustra den un forma hopi suptil, cu ta un forma pa logra ‘yuda’ Aruba na ‘yega’ na e situacio financiero mas sano y evita cu cos sigui bay foi man. El a referi na e debe nacional cu a crece di 40% te na 90%.