Knops: Geschillenregeling ta keda un topico importante

ORANJESTAD – Mientras cu e no a contesta e pregunta di ‘ki problema gobierno Hulandes tin pa laga un organo independiente regla disputanan entre e paisnand di Reino Hulandes’, secretario di estado Hulandes Raymond Knops a sigura prensa cu e areglo di dispusta (geschillenregeling) ta keda un topico importante.  E mandatario a admiti diahuebs na Aruba, cu e topico aki ta biba mas di 8 aña caba (for di e areglo 101010 di Corsou) y cu esaki a tarda. Knops a recorda cu na formacion di Corsou como un pais autonomo den Reino (manera Aruba), Hulanda a priminti pa tal areglo keda formalisa. Pero 8 aña despues, Hulanda tin problema pa ‘laga los’. Y den su declaracionan por nota e ‘resistencia’ di Hulanda pa cu e tema. 

TRAHA BON PA EVITA DISPUTA

Durante e conferencia di prensa di premier Hulandes Mark Rutte diamars merdia,  Knops  -cu ta acompaña Rutte durante e bishita- a bisa solamente cu tin un concepto riba mesa y cu e ta warda esaki keda trata proximamente den Tweede Kamer na Hulanda (na juni proximo). “Nos tin cu traha bon hunto, y e ora no tin disputa” Knops a bisa, indicando tambe cu menos disputa tin, menos tin cu aplica e ‘areglo di disputa’. E ta sinti cu no mester exagera e problemanan cu por tin, pa hustifica posiblemente un areglo di disputa. A mustra tambe cu tin yen di versionan ‘mistico’ di e asunto, cu mester wordo evita. Knops a bisa di ta spera un debate husto den Tweede Kamer na juni, unda cu hasta miembronan di Caribe Hulandes por debati, presenta amiendanan y ta participle. Pero, a keda cortico na duna un contesta riba e pregunta real, esta ki problema Hulanda tin pa acepta un organo independiente  regla disputa entre e paisnan di Reino Hulandes.