Reino Hulandes a adapta conseho di biahe pa Venezuela

DEN HAAG – Reino Hulandes a adapta su conseho di biahe pa Venezuela diamars. Esaki relaciona cu posibel disturbionan anuncia na e pais bisiña pa diaranson 23 di januari 2019. “Pa 23 di januari 2019 oposicion y gobierno a anuncia demonstracionan nacional” e mensahe ta bisa. “Esaki por conduci na confrontacion y violencia. Pesey evita demonstracionan. E frontera entre Venezuela y Colombia y Brazil ta insigur. Esaki ta debi na protesta, blokeo riba caminda, gruponan arma y netwerk di contrabanda criminal rondo di e region di mina” e mensahe ta sigui bisa. “Tambe tin biaha tin confrontacion cu e ehercito. Pesey ta recomenda pa no biaha pa e parti di frontera cu Colombia y Brazil. Tambe e parti zur di e lago di Maracaibo ta insigur. No biaha eynan. Den henter e pais e ayudo medico ta limita y gasoline ta schars” e conseho ta finalisa bisando.

SITUACION ARUBA

NoticiaCla a raporta  recientemente di e conmocion cu tabatin rondo e fecha aki caba pa un actividad cultural na Paseo Herencia, cu mientrastanto a keda cancela. Tin informacion no confirma cu tin un actividad di demonstracion pendiente pa diaranson anochi riba Plaza Bolivar. Detayes di e actividad aki no ta conoci pa e portal aki. Pa loke ta e conseho di biahe por lesa e conseho completo AKI.