Rutte ta sigura cu e ta satisfecho cu bishita cortico na Aruba

ORANJESTAD – Gobierno di Aruba a keda satisfecho cu e bishita relampago di premier Hulandes Mark Rutte diamars, y visa versa. Segun Wever,  e reunionnan a bay den un bon ambiente y ta nota cu poco poco pero sigur Aruba ta ganando e confiansa bek cu nos a perde di parti di Reino pa motibo di un gobierno anterior iresponsabel. E gabinete a cita e post di Rutte riba su pagina di Facebook pa ilustra esaki tambe. Aki Rutte ta confirma su satisfaccion cu e bishita y ta ‘aplaudi e intencion di gobierno pa traha pa un bon gobernacion, duradero y finanza balansa, inversion den sector social di Aruba y den seguridad’. 

NOTICIACLA

Despues den un conferencia di prensa, riba pregunta di NoticiaCla, a referi na e mesun post aki. Rutte a sigura e portal aki cu e relacion cu Aruba ta bon, semper tabata bon aunke aki aya por tabatin diferencia di opinion. “Nos por rabia cu otro, pero e ora nos ta atende cu otro directamente. E ora nos ta coi telefon y papia cu otro directamente” Rutte a bisa e portal aki. “Ainda mi no tabatin problema cu e gabinete aki” Rutte a bisa cu un sonrisa. Mes momento e ta sigura cu durante e gabinete anterior di Aruba tambe a traha bon y tur caminda por tin diferencia di opinion unda cu otro ta papia duro cu otro, pero despues ta sigui dialoga.