Abogado a pidi absolucion di tur cargo pa Capriles den caso Ibis

ORANJESTAD – Abogado pa sospechoso den caso Ibis G. Capriles, esta Chris Lejuez a pidi absolucion di tur 2 cargo cu e cliente tin contra dje, esta e.o. di ta miembro di un organisacion criminal y malversacion di fondo durante e tratamento diamars mainta den sala di corte. Segun e abogado, y despues Capriles mes su declaracion, no tin pruebanan contundente pa sostene e acusacion pa cual e abogado a pidi libertad completo di su cliente. Ademas, haya un castigo di  220 ora di trabou comunitario despues di a sinta 87 dia den prison den aresto preventivo ta suficiente castigo caba, aunke no hustifica segun e abogado. Pero e liña cora den henter su caso, segun Capriles mes diamars den corte, ta cu su hefe esta ex minister Paul Croes mes a confirma den corte na varios occasion, cu e (Croes) tabata esun finalmente responsabel pa actonan di e fundacion. “Esey so ta absolvemi di tur cargo” Capriles a bisa huez. 

TRATAMENTO

Abogado a cuminsa na desmenti e cargonan cu tin contra su cliente. E argumentonan presenta a keda clarifica punto pa punto, manera e hecho cu ora cu e fundacion a paga pa cubri e debe di estudio di e ex mandatario, Capriles no tabata na Aruba. Y tambe cu pa e pago di e airco, e ex mandatario a hustifica e motibo suficiente, esta cu tabata pa usa parti di cas di Croes como un cede di campaña (ya cu a benta e cas di partido na ex Rio Grande abou). E parti di pago na joyas tampoco Capriles a haci, debi cu e no tabata na Aruba. Pero asina mes, tur pago haci, tur accion tumai, tabata cu aprobacion di e ex mandatario segun Capriles. El a admiti di a haya un fiansa di 200 florin for di e fundacion, pero esaki tabata cu aprobacion di Croes, y cu e lo a paga esaki bek. Esey no a sosode debi cu a haci inval y a bay cu tur informacion necesario. “Lo paga esaki bek” Capriles a sigura. Na final, a pidi pa tene cuenta cu e hecho cu e ta un ‘first offender’, esta cu ta su prome interaccion cu husticia, y cu e ta un pashent di curason y ta e proveedor principal di e famia. 

FISCAL 

Manera por a spera, fiscal a cuestiona e  defensa di Capriles, argumentando cu contrario na declaracion di Capriles, e conversacionan getapped, y e recibonan di varios pago ta claramente pinta un otro cuadro. Ta facil pa cera wowo pa e recibonan y bisa despues cu bo no tabata na altura di pakico e tabata segun e fiscal. Pero como presidente di e fundacion, ta responsabilidad di dje pa wak tur cos y eynan e lo a mira pa kico e pagonan tabata. Fiscal a mustra entre otro, cu recibo di pagonan pa p.e. supermercado Ling & Sons y un cuminda na Kentucky, ta mustar cu dificilmente esaki por ta e meta di e fundacion. Ademas, argumento cu Capriles tabata den exterior ora cu cierto pagonan a tuma lugar, no ta sosteni. “No ta pasobra bo ta den exterior, bo no no ta responsabel pa algo asina. Bo ta keda responsabel y mester ta na altura di tur loke ta sosode” fiscal a argumenta como defensa. Den dupliek, contra defensa, Lejuez a sinembargo argumenta cu su cliente no ta akinan pa bringa cargonan di ‘control’ di recibo, sino  di malversacion. Ademas tur loke el a haci (Capriles) tabata despues di a haya un splicacion convincente prome cu el a actua di e forma cu el a actua. Huez a cera su caso y lo dicta sentencia na februari.