Henriquez: Ta lamenta inmensamente cu Rio Grande a wordo demoli

ORANJESTAD – “Nos ta lamenta inmensamente cu diasabra, contra di nos miho intencionnan e cas di cunucu conoci como Rio Grande den curazon di Noord a wordo demoli”. NoticiaCla.com a ricibi un comunicado di e doñonan nobo y desaroyado di e establecimento, cu ta confirma kico a sosode, y ta purba splica mas bien e pakico. For di momento di e suseso, tabatin hopi reaccion di tur banda. Pero e doñonan nobo mes no a reacciona sino te diasabra anochi. Den e comunicado no ta menciona e nomber di e desaroyado, pero ta conoci cu ta trata di e conocido comerciante local Raoul Henriquez , cu tin varios establecimento riba nos isla. E ta splica pues den e comunicado kico a pasa cu e cas di cunuco historico a wordo demoli. Y e motibo principal  segun e. Segun e desaroyado, en vista di un posibel intervencion gubernamental y e daño y perjuicio importante cu esaki lo causa, ‘nan a haña nan mes forza di cambia nos plannan original’. Pues de hecho, tardansa y burocracia di gobierno a conduci nan na loke a sosode diasabra mainta.

Segun ‘e desaroyado’, hopi a wordo bisa y skirbi riba e topico aki den week-end. “Mayoria speculacionnan infunda y ningun fuente a tuma contacto cu nos pa informacion” e desaroyado ta sigui bisa.

“ Manera tur hende cu conoce nos bon sa, semper nos tin nos cultura y nos historia na curazon y semper nos a haci nos maximo esfuerzonan pa conserva y duna realse na nos patrimonionan en particular” e desaroyado ta sigui bisa. Segun e desaroyado, desde compra di Rio Grande y den tur preparacion di e plannan di desarollo pa cu e sitio aki, semper tawata nan intencion di curazon di conserva e cas bieu aki mientras e parti nobo lo a wordo construi rond di dje.

Segun e doño y desaroyado, a critica e tempo tambe cu a tuma pa completa e formalidadnan pa por a cumpra Rio Grande. “ Pero tambe nos tin cu lamenta cu despues nos a wordo forza pa warda un tempo inhustifica pa nos plannan wordo aproba. Mientras otro autoridadnan ariba nos isla a indica nan intencion pa interferi den nos plannan y asina demora realisacion di nos plannan ainda mas”.

Segun ‘e desaroyado’, tur hende sa cu Gobierno su so no ta capaz pa conserva nos herencia cultural y nos monumentonan. “Si di verdad nos ta spera di logra esaki nos lo mester por conta cu sector priva manera a keda comproba den varios ocasion. Contrario na algun comentario populista, e peliger pa nos monumentonan no ta e falta di legislacion pa proteha nan, sino al contrario. E peliger ta sinta den departamentonan gubernamental excesivamente rigoroso cu en realidad ta stroba realizacion di conservacion comercialmente alcanzable, “ e ta sigui bisa.

Y e desaroyado ta finalisa bisando “Den palabranan sencio, manera nos tawata purba fervientemente pa hiba nos proyecto pa conserva e casita bunita aki dilanti, instancianan di Gobierno a haci mas y mas imposibel pa nos logra e meta aki. Nos ta lamenta profundamente cu otro edificio destaca mester a bira victima di e manera di traha y pensa di nos aparato Gubernamental”. (lesa e comunicado completo aki) .Foto di Ryan Peterson.