‘Honor to Connor Steelband Extravaganza’ a tuma lugar diabierna na San Nicolas

Posted on 01/21/2019 5:16 pm AST | Updated on 01/21/2019 5:16 pm AST

SAN NICOLAS - Diabierna anochi Sweet Pan Music Productions a presenta’ Honor to Connor Steelband Extravaganza’ dilanti di Charlie’s Bar na San Nicolas. Un anochi unda a comemora y honra Pionero den musica Steel Pan y Fundador di The Aruba Invaders Steel Orchestra, Sr. Edgar Connor riba su fecha natal 18 di Januari. Si Sr. Edgar Connor tabata na bida, lo ela cumpli 80 aña. Gregory Richardson tabata e MC pa e evento y pa e ultimo parti Ruben Garcia a continua como MC y a presenta su programa ‘Riba Bou’ live via canal 22. E anochi tabata uno sumamento exitoso cu a inicia cu entrada di famia Connor na pia tocando pa mustra e public con antes Sr. Edgar Connor y tur e musiconan di steelband tabata cana den paradanan di carnaval den e solo cayente cu nan Steel Pan rond di nan neck y otro musiconan cu campana y hop den man.  MC Gregory Richardson a conta un poco di e historia di Steel Pan y tambe a declama un poesia dedica na Sr. Edgar Connor.  E studiantenan di Aruba Panman Foundation cu ta haya les na Skol di Arte a subi escenario pa prome biaha y a duna un bunita presentacion. DJ Caleto a presenta su mix di musica di Steel Pan di antes. Marver Guedez a bin cu un seleccion di musica moderno alegre riba Steel Pan den combinacion cu e backing tracks.  Tabata tin presentacion di The Boyz Pan Experience y tambe di Quiver Quips Steel Orchestra cu porcierto a reuni despues di hopi aña pa e anochi special aki. A canta Happy Birthday, a corta bolo y a parti cupcakes den publico. Y ta na e momento aki cu Sra. Gloria Thomas Connor a subi scenario ta baila y a toca e hop un rato, y hunto cu su sobrina Sra. Diana Clark cu tambe a hasi aña a corta e bolo. Sra. Gloria a haya e prome pida bolo cu ela share cu su yuinan Nico y Lee ariba escenario.  MC Ruben Garcia a presenta su programa ‘Riba Bou’ live via canal 22 y a presenta e ultimo banda pa e anochi, The Invaders cu a wordo compaña pa un Carnival Costume Show presenta pa Carnaruba y tambe pa e cantante Might Rusty cu a presenta algun hits di añanan anterior incluyendo un cancion dedica na Sr. Edgar Connor, ’Mr. Man’ (on he first pan) composita pa Antoni Gario 25 aña pasa.  Minister di Cultura Sra. Xiomara Maduro tambe tabata presente y a duna un bunita speech. E anochi tabata tin su sorpresa cu ne, unda a presenta e T-shirt pa 18 di maart dia di Aruba pa Marietje Printing. Marietje a keda encanta cu e diseño di e poster di evento cu ta un Steel Pan cu Sr. Edgar Connor a regala Sr. Charles Brouns Sr. y pinta pa Charles Brouns Jr. Y asina a pidi e rumanan Connor pa uza e diseño di Steel Pan cu un adaptacion cu e bandera di Aruba su tras pa presenta esaki como e logo official pa e T-shirt di 18 di maart dia di Aruba y Brinda honor na Sr. Edgar Connor cu a contribui enormemente na nos carnaval, na nos cultura. Marietje Printing a regala famia Connor un canvas cu e logo official. Famia Connor a ricibi nan regaldo di Minister Xiomara Maduro y MC Ruben Garcia y a keda sumamente contento y orguyoso di mira e Steel Pan como e logo official pa e T-shirt di 18 di Maart dia di Aruba.

  • Powered by SETAR