Buelonan di InselAir entre Aruba, Corsou y Bonaire ta cancela te diaranson

ORANJESTAD/WILLEMSTAD – InselAir a cancela tur su buelonan entre 18 pa 22 di di januari 2019 pa motibo di mantencion di avion. E aeroliña a pidi despensa pa e inconveniencia cu esaki por a causa. E cancelacion pues a cuminsa for di siman pasa diabierna. “Nos ta pidi despensa pa esaki y ta haciendo lo maximo pa percura pa tur pasahero yega nan destinacion mas lihe cu ta posibel” e comunicado ta bisa. Mas atardi un otro comunicado a clarifica cu ta trata pues solamente e ruta menciona ya cu pa e otro ruta, Corendon Airlines ta efectua e biahenan ey, manera pa St Maarten. Nan ta spera cu e avionan por ta bek den servicio pa diaranson. A pidi pa e pasaheronan check e status di nan buelo via nan portal, www.fly-inselair.com.

TEMPO

E aeroliña pa basta luna ta pasando den problemanan serio di operacion y finanzas.  Varios caso den corte ta mustra cu cada bez e ‘bida’ di e aeroliña ta keda alarga cu algun tempo mas. Pa e parti ey ‘suerte’ ta na banda di e aeroliña. Ta siman pasa ainda huez a bolbe tene compacion cu e aeroliña door di no dicta bancarota ora cu mes momento el a rechasa e deal pa interCaribbean tuma e aeroliña over. Proximamente, un apelacion di e sentencia dicta siman pasa 16 di januari 2019, tin cu determina si e bancarota ta bin si of no ainda. Pa loke ta cancelacion di e buelonan, esaki no ta prome biaha cu e ta sosode, ya cu den pasado, esaki a sosode caba unda cu e aeroliña ta hay’e forza di cancela varios dia di buelo, perhudicando e pasaheronan pega tur caminda riba e islanan di Caribe Hulandes. No ta conoci cuanto pasahero e biaha aki ta perhudica.