Propietario di Power FM ta distancia di e emisora pa un tempo

ORANJESTAD – E propietario di e emisora Power FM, Ralph Maduro ta tuma distancia di e emisora, particularmente su parti ‘on air’ y lo tuma e tempo pa refleciona riba loke a pas’e den fin di siman. Asina el a confirma pa NoticiaCla dialuna atardi. Manera ta conoci, debi na un actuacion no corecto (causa destruccion na propiedad), e propietario di e emisora a keda deteni diadomingo marduga.  Na radio dialuna mainta, el a pidi despensa na su audiencia y su famia y a bisa cu e ta sinti su mes abergonza di su actonan y lo tuma un tempo pa su mes y reflecciona. Despues e lo dicidi su siguiente paso. 

E CASO“Mi a haya mi den un discussion y mi a reacciona robez y mi a kibra material cu tabata pertenece na mi mes persona” Maduro a bisa NoticiaCla. E ta lamenta cu varios medio a raporta cosnan cu no a pasa. El a sigura cu ningun momento tabatin contacto fisico cu ningun persona y e no tabata bou di influencia. Mes momento e ta conciente y ta acepta cu el a actua hopi malo. “Logico cu loke mi a haci ta robez” Maduro a bisa. E marduga unda cu el a ‘flip’ manera e ta bisa, e la actua robez, y despues ora cu polis a bin, el a sigui nan orden. Segun Maduro, polis a bis’e cu tin un proceso cu ta encera cu e mester a acompaña nan y a keda den un cel pa 8 ora, confirme regla. A interoge y despues diadomingo merdia a lag’e bay. Segun Maduro, el a traha hopi duro pa yega unda cu e ta, pa den un mal momento y decision, e hay’e den algo asina. No ta conoci ki dia e ta bolbe radio bek, ni ki paso e tin pensa di tuma. E tabatin e programa Oyoyoy, den ora di mainta awor cu e director, Ruben Garcia tin e timon di e orario di merdia pa periodo di carnaval.