Fiscal a pidi 5 aña di prison pa ex minister Paul Croes den caso Ibis

ORANJESTAD – Ministerio Publico a pidi 5 aña di castigo di prison pa ex minister Paul Croes pa e caso Ibis, y 240 di trabou comunitario pa su casa Melony Paesch. Aparte di e castigo di prison, a pidi pa e no eherce ningun funcion politico pa por lo menos 10 aña. Fuera di Croes, a pidi castigo di prison pa solamente dos sospechoso mas di henter e lista di 23 sospechoso, esta tramitador Filiciana y comerciante Schwengle y pa e resto, ora di trabou entre 30 pa 240 ora di trabou.  

REACCION CROES

Croes mientrastanto a para ariba na 24ora dialuna merdia cu e no a wordo soborna, y no a tuma placa a cambio di ontheffing y cu su defensa lo demonstra esaki den corte diaranson awor ora cu nan haci e defensa. 

MELONY PAESCH

“Mi ta haye un berguensa pa sistema hudicial aki na Aruba. Nan a dunami un vacation to hell, pa verzwak mi casa den e caso aki” Paesch a bisa. E no ta di acuerdo cu e caso, ni e sentencia y e ta yame hopi ridiculo y un berguensa.

OTRO SOSPECHOSONAN

Abogado pa algun di e sospechosonan, esta Chris Lejuez, ta haya cu e peticionan di castigo ta ‘val mee’, si tene na cuenta cu ta solamente 3 di e 23 sospechosonan, a pidi castigo di prison pa nan esta Schwengle  cu a pidi 16 luna y Filiciana a pidi 2 aña di prison, mientras cu pa e otronan a pidi trabou comunitario, variando pues di entre 30 pa 240 ora di trabou.