Fuera di Paul Croes, lo pidi castigo pa mayoria sospechoso den caso Ibis

ORANJESTAD – Ministerio Publico ta considera e grupo di sospechoso den caso di Ibis, den e caso aki esnan cu ta sospecha di ta parti di un organisacion criminal (por lo menos 3 pa 4 sospechoso), di ta un grupo di persona cu a probecha di comunidad di Aruba. Pa nan tambe lo tin un castigo posibel, aunke obviamente menos cu e sospechoso principal, ex minister Paul Croes. Asina fiscal ta splica den su rekisitorio.  Den caso di Paul Croes ta haci mencion specifico di castigo di prison. “Nan a profita di un forma sin berguensa, di e practica malo di ex minister Croes, y a haci esaki tambe posibel. Obviamente nan parti tabata mas chikito, pa cual nan castigo lo ta menos tambe” Fiscal ta sigui bisa. Como tal e rekisito pa castigo lo ta considerablemente mas abou. E rekisitorio no ta specifica si ki tipo di castigo ta spera nan. “Aki tambe OM ta tene cuenta cu e falta completo di vision y arrepentimiento”.

BASHAKA

Pa e grupo di sospechoso cu tabata forma parti di e organisacion criminal Bashaka, OM ta considera cu nan a converti e corupcion den nan propio negoshi. “Door di nan forma di traha, nan haci posibel pa e ex minister di labor por a ‘bende’ hopi decisionan (pa duna ontheffing), di un manera relativamente simple” ta sigui bisa den e rekisitorio. Pa e sospechosonan Schwengle y Vasquez, ta conta tambe cu banda di e hecho cu nan a laga un grupo di hende paga un suma cuantioso caba pa soborna e minister, ainda tabata cobra nan un suma extra mensualmente. E sospechoso Filiciana tabata bay asina leu, segun Fiscal, cu e tabata laga su mes wordo manda pa e ex mandatario, y molestia esnan en busca di un permiso cu a haya un ontheffing di DPL. Den nan caso sinembargo OM ta tene cuenta cu e cooperacion di nan. Por ehemple e hecho cu Schwengle a coopera grandemente cu e investigacion y rapidamente a ‘basha abou’ di su envolvimento. Filiciana a haci esaki tambe, pero te na final, despues cu a confronte cu pruebanan contundente.  

TRAMITADOR NUÑEZ

Segun fiscal, e persona cu ta keda for di e grupo menciona di sospechoso, ta e ex tramitador Nuñez. Pa Nuñez, ta conta cu el a abusa sin berguensa di su posicion dentro di e ex partido di gobierno e tempo ey (AVP:red). “Door di cu e por a garantisa su clientenan un permiso di trabou, y esey tabata por solamente pasobra el a soborna (ex minister Croes), el a maneha un negoshi briyante como tramitador”. Segun Fiscal, por compare cu e otro tramitador Filiciana, cu e diferencia cu Nuñez no tabata importa kico el a haci y cu e loke el a haci, no tabata possible.

MONG

E Chines Siem Mong, tambe a haya un mencion separa den e rekisitor. El a fungi como un ‘intermediador’ entre e minister y e grupo cu a soborna, pero ta parse cu e no a saca probecho financier. Ta bin acerca cu el a duna cuenta facilmente na landsrecherche y cu e hechonan aki, OM ta tene cuenta.

POR CAMBIA

Mientrastanto mester tene cuenta cu e parti aki di e rekisitorio, lo keda presenta entre dialuna y diamars, y e portal aki a compronde cu tanten cu no ‘lesa’ of ‘haci mencion’ di esaki den corte, e no ta bira official ya cu fiscal por opta pa desvia di esaki tambe. Pero e ta riba e rekisitorio cu NoticiaCla tin den su poder, y mester bisa cu diabierna ora cu fiscal a lesa e prome parti, el a tene su mes na e rekisitorio completo.