Clarificacion gobierno riba asunto di permiso, mucho laat pa Gruponan Uni

ORANJESTAD – “Gobierno ta confirma cu ningun permiso a wordo otorda pa organisa carnaval 2015” . Asina e comunicado cu a bin di parti di gobierno diasabra anochi ta bisa, pa purba clarifica e situacion di permiso di carnaval. Esaki a surgi entre diabierna y diasabra ora cu a bira conoci cu SAC a haya e permiso pa organisa e apertura di carnaval cu ta e actividad riba 11-11-2014. Problema di e clarificacion aki, sinembargo ta ‘a little too late’. Asina un miembro di e grupo Uni a bisa NoticiaCla.com diasabra riba reaccion di e comunicado cu gobierno a manda diasabra anochi.

Den e comunicado di diasabra anochi, ministerio di asuntonan general ta bisa cu ‘a informa Cuerpo Policial ya algun siman caba cu pendiente e reunionnan cu Minister di Cultura tabata dirigiendo pa yega na claridad riba e tema di discussion entre gruponan di carnaval y SAC cu no lo duna permiso ainda na ningun organisacion pa organisa Carnival 2015’. Segun gobierno, locual a keda otorga ta ‘un permiso pa un evento di 11 di November na SAC cual permiso tur otro grupo tambe tin derecho pa solicita pe y haya’.

Segun e comunicado, e siman aki Conseho di Minister a trata un carta di un cantidad hopi grandi di gruponan di Carnaval cu ta expresa di lo no participa na un Carnaval organisa dor di SAC y cu nan lo kier haya e derecho pa bira e organisacion pa organisa Carnaval 2015. Conseho di Minister a dicidi pa solicita mando Policial pa reuni cu SAC pa presenta e situacion aki cu un cantidad hopi grandi di gruponan no kier participa mas na Carnival cu SAC. “Despues di e reunion aki, cu lo tuma lugar Dialuna, un decision lo cai den Conseho di Minister riba e otorgamento di permiso pa organisa Carnaval 2015”.

NoticiaCla.com mesora a acerca e fundacion Grupo Uni, cu a confirma pues cu nan ta para riba nan decision di mas tempran, cu nan no ta participa mas. E carta nan tambe a ricibi, pero ‘it’s a little too late’. Como tal, e carta aki lo no tin ningun efecto riba e situacion cu a surgi den curso di diabierna pa diasabra. (lesa e comunicado di gobierno aki)