Premier Rutte di Hulanda cu un dia di bishita na Aruba

ORANJESTAD - Diamars awor, 22 di januari, Prome Minister Mark Rutte di Hulanda ta di bishita na Aruba. Tempran mainta, Gobierno di Aruba ta ricibi Premier Rutten na aeropuerto. Despues, Premier Rutte tin un reunion cu Gobernador di Aruba, Señor Alfonso Boekhoudt y lo sigui despues pa un reunion cu Prome Minister di Aruba, Evelyn Wever-Croes. Despues di reunion di e dos Premiernan, lo reuni cu Ministerraad.

Meta di e bishita di Premier Rutte ta, probechando cu e ta bishitando Corsou y Bonaire pa asuntonan economico, e ta haci su prome bishita oficial na Gabinete Wever-Croes. Temanan cu lo dilibera ariba ta entre otro e situacion financiero di Aruba. Esaki ta un topico cu semper  Premier Rutte a mustra su interes riba dje. Prome Minister Wever-Croes a conbersa cu Premier Rutte riba e tema aki na mei ultimo durante su bishita na Hulanda y tambe na New York hunto cu e delegacion di Reino. Otro tema di atencion ta e crisis migratorio di Venezuela. Aki lo evalua con leu ambos Gobierno ta cu esaki y con leu Aruba ta pa haya sosten riba e problematica aki. 

Riba agenda di e bishita di Premier di Hulanda, tin un bishita na aeropuerto pa observacion di e Proyecto Gateway 2030. Despues ta sigui un conferencia di Prensa conhunto na aeropuerto prome cu Premier Rutte continua su biahe pa Hulanda.