Otro siman secretario di estado Raymond Knops ta bishita Aruba

ORANJESTAD – Manera ta conoci, staatssecretaris di Hulanda  Raymond Knops lo ta di bishita otro siman na Aruba pa algun dia. Señor Knops lo ta presenta na e mainta di acto protocolar di Dia di Betico.  Durante e bishita di Knops, e lo atende cu algun aspectonan financiero. Tambe tin riba aganeda pa presenta na Señor Knops tur informacion di e Crisis Plan Social y tur locual cu Gabinete Wever-Croes ta haci den e cuadro aki. 

Tambe, riba interes di Knops, Gobierno lo presenta informacionnan tocante e maneho di desperdicio na Aruba. E lo bishita e localidadnan cu tin pa pone su mes na haltura di kico tur Aruba ta haciendo riba e tereno aki.  

Esakinan ta dos tema principal cu lo wordo trata durante e bishita di Señor Knops na Aruba pero, Prome Minister Evelyn Wever-Croes a duna di conoce cu lo tin mas temanan cu lo wordo trata prome cu Señor Knops bandona e isla.