OM lo sugeri un castigo di prison pa ex minister Croes di mas di 3 aña

ORANJESTAD – Ex minister Paul Croes lo por haya un castigo di mas di 3 aña di prison, si ta pa ministerio publico. Asina e fiscal ta relata den e rekisitorio amplio. Mientras cu pa motibo di tempo, fiscal no a logra yega na formula e castigonan pa ex minister Paul Croes oficialmente y e otro sospechosonan den caso Ibis, e rekisitorio di fiscal di 171 pagina ta sugeri den ki direccion ministerio publico lo bay. Esaki pasobra den e parti di motivacion di castigo, nan ta haci mencion di un castigo di prison di sigur mas di tres aña di prison. Mester bisa si cu ainda e parti ey, no a keda presenta publicamente ya cu e ta casi na final di e rekisitorio. Mientrastanto a pone un dia extra pa ministerio publico por continua cu nan rekisitorio, cu ta dialuna awor. Unabez cu caba cu esaki, lo formula e castigonan cu kier pidi huez pa duna e sospechosonan.

TEMPO

Contrario na e palabracion anterior, fiscal no ta presenta e demanda mas den caso Ibis diabierna. Esaki debi cu pa motibo di e largura di e rekisitorio, no a resta tempo pa keda cla cu esaki diabierna mas. De hecho, a programa awor pa dialuna sigui cu e rekisitorio. No obstante esey, segun e rekisitorio, ta mustra cu si ta pa ministerio publico, por conta cu un castigo di por lo menos mas cu 3 aña di prison pa ex minister Croes. Segun e rekisitorio, ministerio publico ta usa e comparacion cu e caso di ex premier di Corsou Gerrit Schotte, cu a haya 3 aña di prison pa e.o. corupcion. Den e caso di Croes sinembargo, ministerio public di Aruba ta considera cu e caso aki (Ibis) ta mucho mas pio y como tal por conta cu un castigo di prison hopi mas grandi. Con hopi mas, no ta conoci, pero si sigur mas cu 3 aña di castigo di prison. “Den caso di Croes nos ta bin cu un castigo mas halto y un medida mas amplio (compara cu Schotte, cu a wordo prohibi alabez di no por ta eligible politicamente pa 5 aña).

DURACION LARGO

Segun fiscal, ta considera e practicanan illegal di Croes di duracion mas largo, y tin mucho mas contenido, pa no papia mes di e impacto mas grandi cu e tabatin ribas comunidad di Aruba. 

STRANHERO

Door di e caso aki, Croes a permiti (segun rekisitorio di ministerio publico) cu un cantidad innecesariamente grandi a wordo permiti pa drenta Aruba, cu a pone cu un cantidad innecesariamente grandi di Arubiano no por a haya trabou. Ademas a crea e impression cu hopi hende den comunidad ta pensa awor caba cu ta normal pa un minister ricibi regalo pa contra prestacion. Esaki a keda mustra e siman aki ainda durante un discurso di presidente di Banco Central Jane Semeleer cu a relata na e encuesta haci aña pasa unda cu gran parti di esnan encuesta, ta kere cu corupcion na Aruba ta algo normal.

DESCUALIFICA

Segun Fiscal, Croes a descualifica su mes completo como ambtenaar, y como tal no por bolbe bek mas den un funccion asina. Como tal, ministerio publico ta scohe pa un duracion maximo di e medida di no por eherce su derecho di voto y of postula su mes den un function politico. Pues lo scohe pa usa e maximo termino di castigo riba e termino aki tambe. Asina Fiscal ta splica den e rekisitorio. No ta conoci ki dia awor lo tin e presentacion di demanda contra Croes y e otro sospechosonan. Diabierna merdia fiscal lo continua cu su rekisitorio y dialuna tambe.