Awe fiscal ta presenta su demanda contra sospechosonan den caso Ibis

ORANJESTAD – Awe fiscal ta presenta su requisitoir den e caso di Ibis, osea e caso unda ex minister Paul Croes y demas sospechoso ta tende ki castigo OM ta pidi huez pa nan. Despues di varios dia di tratamento di e testigonan, awe ta momento pa fiscal bisa huez pues cuanto castigo cada sospechoso mester haya. Despues ta keda na huez pa determina a base di e informacion final, si e ta tene su mes na e peticion di e fiscal of si e ta cambia esaki.

CASO

E caso a cuminsa dialuna cu presentacion di e hechosnan segun fiscal, unda cu tur e sospechosonan por a reacciona personalmente kico nan ta pensa di e cargonan presenta contra nan. Esaki a cuminsa dialuna mainta cu e sospechoso principal Paul Croes y a sigui cu demas sospechoso. Despues cu fiscal presenta su demanda awe (diabierna), dialuna otro siman ta turn na e abogadonan pa presenta nan defensa riba e cargonan presenta pa fiscal. E caso su ultimo dia ta poni pa dia 31 di januari 2019. E caso ta uno unda cu e sospechosonan ta wordo sospecha di fraude, corupcion, labamento di placa, falsificacion di documento y soborno, entre e cargonan referente ontheffing pa permiso. E ta varia pa sospechoso. Entre nan tin e ex minister Paul Croes cu tin varios di e cargonan ey contra dje. Keda pendiente pa e cobertura di NoticiaCla.