Semeleer: Via LAFt, Gobierno di Reino a bira supervisor primordial di Gobierno di Aruba

ORANJESTAD – “Ta lamentable cu mientras cu conceptonan di ley a wordo presenta pa hiba finanzas di gobierno riba un rumbo sostenibel, tin cu nota cu un partido externo, den e caso aki gobierno Hulandes, mester a eherce presion extremo pa pone esaki na lugar pa medio di e ley di Laft, esta Landsverordening Aruba Tijdelijk Financieel Toezicht “. Na palabra, Presidente di Banco Central di Aruba Jane Semeleer durante e di dos simposio riba bon gobernacion diaranson anochi na Paseo Herencia. Su discurso a hala hopi atencion, ya cu ta poco biaha cu un presidente di e instituto financiero aki ta bin afo y papia, y sigur riba e tema aki. Fuera di Semeleer, Prome minister Evelyn Wever, PG Alexander van Dam, y Rocco Tjon tambe a hiba palabra. 

HULANDA TA MANDA

Mas interesante ta e hecho cu Semeleer a confirma loke hopi ta cuestiona, esta ken tin e autoridad riba e tema di finanzas publico na Aruba, y Parlamento a perde esaki. “Pa medio di e LAFT, Gobierno di Reino tambe a bira e supervisor primordial di gobierno di Aruba” Semeleer a bisa den su discurso. “E prome supervisor di gobierno di Aruba, osea Parlamento, no tabata iniciador di e leynan aki” e presidente ta sigui bisa. Pero ora cu mester a bay den detayes, pa determina e causa di e fayo di parlamento pa tuma decisionan decisivo y na tempo, si Selemeer a opta pa no sigui. “Esey ta un topico cu riba su mes mi lo no atende na e occasion aki” Semeleer a sigui bisa.  

LAFT TA GARANTISA BON GOBERNACION?

Segun Semeleer, mientras cu ta un bon comienso pa tin LAFT na su lugar cu e meta pa yega un presupuesto balansa, e no ta garantisa bon gobernacion. Lesa su discurso completo AKI.