Segun encuesta, e sistema parlamentario ta contribui na corupcion na Aruba

ORANJESTAD –Esistema actual parlamentario ta contribui na corupcion na Aruba.Por lo menos segun mas di 50% di persona cu a keda encuesta pa Banco Central di Aruba recientemente. Durante e di dos simposio riba bon gobernacion titular ‘The Road to Good Governance II’ na Paseo Herencia diaranson anochi, presidente di Banco Central Jane Semeleer a trece e resultado preliminar di e encuesta cu a tuma lugar aña pasa entre 12 y 26 di November 2018 riba nos isla. Y e resultado tabata basta impactante. 

RESULTADO

Segun Semeleer, cu tabata parti di e elenco di orador, entre esnan encuesta a resulta cu ‘riba 70% di esnan encuesta, ta kere cu e problema di corupcion ta cubri Aruba completo, mientras cu un cantidad marginal ta kere cu ‘no tin corupcion’. Mes momento ‘ casi 70% ta di acuerdo cu tin corupcion den institucionan publico, y solamente 20% no ta di acuerdo. “Mas di 50% ta di acuerdo cu e sistema actual parlamentario ta contribui na corupcion na Aruba. Loke ta mas interesante ainda ta cu entre esnan encuesta, como 60% ta ‘considera corupcion como parti di e cultura di haci negoshi na Aruba’. Tambe mas di 70% ta di acuerdo cu faboritismo y corupcion ta stroba e competencia commercial na Aruba. Tur ta cifranan impactante cu ta duna un bista di kico hende ta pensa di corupcion na Aruba. 

REACCION POLITICOUn di e otro oradornan di e anochi despues di Semeleer, lider di fraccion di partido MEP den Parlamento esta Rocco Tjon, a hay’e ta referi na e datonan aki spontaneamente. ‘Mi a caba compronde cu mi ta forma parti di e 50% di e sistema parlamentario cu ta contribui na corupcion. Pues tin hopi trabou pa haci” Tjon a bisa den un forma di chiste, indicando cu tin cu bay traha riba e imagen ey pa kita e ‘mal imagen’ cu hende tin di entre otro, parlamentarionan. Su discurso tambe tabata en cuadro di e tema di e anochi, esta integridad.