Huez a rechasa deal di InselAir, pero no a declara bancarota

Huez a rechasa deal di InselAir, pero no a declara bancarota

Posted on 01/16/2019 3:36 pm AST | Updated on 01/16/2019 3:39 pm AST

WILLEMSTAD – Huez a rechasa e acuerdo di creditornan pa InselAir International diaranson, pero mes momento a acomoda e administrador pa por apela e sentencia di awe. Esaki ta nifica cu enbez di declara e compania bancarota mesora, ta duna oportunidad pa corte di apelacion tira un bista riba e acuerdo un biaha mas. Expertonan legal cerca di e proceso aki a mustra NoticiaCla cu mes momento esaki ta nifica tambe cu e administrador ta haya mas tempo pa sigui busca garantia necesario pa e deal entre interCaribbean Airways y InselAir International keda concretisa. Awe mainta ainda NoticiaCla a cita e matutino Extra cu a papia cu e administrador Rogier vd Heuvel, indicando cu interCaribbean a entrega un garantia den forma di hipoteca riba un di e avionnan di interCaribbean. Esey lo mester tabata suficiente. Pero e huez diaranson a mustra cu esaki no ta suficiente, basa riba cierto puntonan den e ‘deal’ cu interCaribbean a pone. Esey ta cambia full e concepto y e seguridad cu e hipoteca mester duna. Un credito tambe na Banco di Turks & Caicos, (base di interCaribbean) no ta valido pa e huez. Como tal, a rechasa e acuerdo. Den un caso normal, e unico opcion ta keda e ora pa declara e compania en cuestion failliet. Den e caso aki, atrobe, pa straño cu e por zona, a bolbe acomoda e compania y dune mas bida, te ora cu trata e caso den apelacion. Lesa e sentencia AKI. 

  • Peticion di Merca pa Corsou ta hub humanitario pa Venezuela a drenta

    Peticion di Merca pa Corsou ta hub humanitario pa Venezuela a drenta

    WILLEMSTAD – E peticion official di Merca pa Corsou fungi como hub pa ayudo humanitario pa Venezuela, a drenta diasabra ultimo. Asina oficina di informacion di gobierno a informa diadomingo. E peticion ta pa e.o. usa e aeropuerto di Corsou como hub unda cu por e.o. almacena y usa esaki como un punto di hub pa e transporte. Lo usa entre otro cuminda, remedi, awa y otro material di necesidad. Gobierno di Corsou a pone e isla disponibel for di siman pasa, pero cu condicion cu no ta usa producto di Corsou mes, y no ta usa e base di FOL, ni tampoco avionan militar. Lesa e declaracion di gobierno di Corsou AKI. 

  • CCAA: Diasabra awor InselAir ta perde su permit pa bula

    CCAA: Diasabra awor InselAir ta perde su permit pa bula

    WILLEMSTAD – InselAir ta perde su licensia di operacion diasabra awor. Esey ta nifica cu entrante diasabra 16 di februari 2019, nan no tin permit pa bula. Autoridad di Aviacion Civil di Corsou (CCAA) a participa den un carta cu ta den poder di Noticiacla, cu e “Air Operator Certificate” (AOC) di Insel Air ta caduca dia 16 di februari 2019. “ Insel Air por cuminsa e proceso pa haci un peticion pa un AOC nobo mesora y CCAA lo trata esaki mas pronto posibel. 

  • Paisnan amigo mester mitiga efectonan di eventual represaya contra Corsou

    Paisnan amigo mester mitiga efectonan di eventual represaya contra Corsou

    WILLEMSTAD – Gobierno di Corsou ta spera represaya contra nan asina cu e isla cuminsa fungi como hub humanitario pa Venezuela proximamente. Como tal Prome Minister di e isla Eugene Rhuggenaath ta spera cu paisnan manera Merca y Hulanda mitiga e efectonan di un eventual represaya di Venezuela su actual gobierno. E fecha pa cuminsa actua como hub no ta stipula ainda pasobra no a haya e peticion official. Unabez cu esey ta conoci, por bisa ki dia y kico exacto Corsou su tarea ta bay ta. Mes momento a mustra cu financieramente Corsou no por carga e operacion aki sino netamente por usa e facilidadnan manera aeropuerto (parti civil) y haf, y lugarnan pa almacena eventual mercancia humanitario. Mas cu esey, Corsou no por duna y haci. A sigura pa publica repetidamente cu no ta trata di un accion militar, pa gobierno actual di Nicolas Maduro no ‘confundi’ esaki cu un operacion militar. E mandatario ta conta cu posibel represaya den forma di un cierre di frontera manera cu a sosode na 2018 caba. 

  • Peticion official pa Corsou fungi como hub humanitario pa Venezuela na caminda

    Peticion official pa Corsou  fungi como hub humanitario pa Venezuela na caminda

    WILLEMSTAD/ORANJESTAD - Un peticion oficial pa Corsou por bay fungi como hub humanitario pa e pueblo di Venezuela ta na caminda. Asina oficina di informacion di gobierno di Corsou a informa diaranson atardi. Segun e informacion, Promé Minister Eugene Rhuggenaath a splica caba anteriormente cu còrsou ta dispuesto pa fungi como hub humanitario pa asina e pueblo di Venezuela por tin aceso na cuminda, remedi y otro necesidad importante. A sigura cu no ta trata di ayudo military, ni tampoco lo usa e base di FOL, pasobra esey ta pa otro meta.  Mescos cu a actua ora cu tabatin horcan na St Maarten, esaki lo ta un tipo di operacion similar, pues pa ayudo civil. No ta conoci ki dia esaki lo cuminsa. Aruba no ta envolvi den esaki segun prome minister di Aruba Evelyn Wever Croes a sigura NoticiaCla diaranson atardi. Wak e mensahe di prome minister di Corsou Rhuggenaath AKI. 

  • Tilgent Capital Trust por bira proximo ‘partner’ di InselAir

    Tilgent Capital Trust por bira proximo ‘partner’ di InselAir

    WILLEMSTAD – E compania Mericano Tilgent Capital Trust por bira e proximo partner di InselAir international. E nomber aki a bira conoci dialuna durante e caso den corte entre interCaribbean Airways y InselAir, unda cu Tilgent a presenta y splica cu nan ta interesa pa tuma e mesun ‘deal’ cu interCaribbean a haya, y cu nan lo deposita 11.5 miyon dollar riba cuenta di e administrador di InselAir, Rogier vd Heuvel, entre dialuna y diahuebs. Segun Ettiene Ys, di e team negoshador, ta dos siman nan ta sintando cu e grupo nobo aki, aunke ta awe numa e nomber a aparece publicamente. Segun Ys, ta debi cu tabatin caso den corte, cu nan a bira conoci. Mientrastanto e otro compania interCaribbean ta den ‘default’ segun e administrador y lo atende cune corespondientemente. Mas detayes no tabata conoci pasobra e representantenan di e compania nobo no kier a divulga hopi. Solamente cu nan ta un compania financiero cu base na Merca y oficina na Trinidad, y cu nan lo busca un operador pa atende cu e parti di InselAir si nan haya e deal. 

  • InselAir a cancela tur buelo entre islanan ABC te proximo aviso

    InselAir a cancela tur buelo entre islanan ABC te proximo aviso

    WILLEMSTAD/ORANJESTAD – InselAir a cancela tur su buelonan entre islanan ABC te proximo aviso. Unico buelonan operacionak ta entre Corsou y St Maarten. Asina e compania a informa diadomingo atardi. Motibo ta problema cu nan avion Fokker desde diasabra. Pa seguridad a opta pa saca e avion foi circulacion, cu ta nifica e problema ya menciona. E avion segun InselAir, ta ok pa bula, pero ti asuntonan cu a aparece durante un auditorio cu departamento di aviacion civil di Corsou. No a bisa kico e asuntonan aki ta. Current Situation InselAir. A bisa cu ta purbando pa acomoda tur pasaheronan miho cu ta posibel. 

  • Powered by SETAR