Grupo Uni: Desicion definitivo cu 15 grupo no ta participa na carnaval 61

ORANJESTAD - Desicion final a cay diasabra merdia despues di un reunion di fundacion Gruponan Uni, cu nan no ta participa na carnaval 2015. "Te awor ta trata di tur grupo, menos e grupo Los Laga Bai" Lienchi Merryweather a confirma na NoticiaCla.com. Mientrastanto e vocero di e grupo, Kevin van Ommeren a declara riba su pagina di facebook, cu despues di un reunion extraordinario, a bisa cu nan lo sigui sostene stichting SMAC, y ta distancia nan mes totalmente for di SAC. 

Esnan cu no ta participa na carnaval 61, ta Carnival Group, Majestic, Champagne, Dushi Carnival Group, Loco Loco, Teasers and Pleasers, Xclance Carnival Group, Empire Carnival Group, OPC Carnival Group, Baby Champagne, Don Flip, Little Groovers, Deja Kids, .Jolly Kids y Nos Futuro. "Nos kier desea SAC tur clase di exito pa cu organisacion di carnaval 2015. 

Mas prome, ta minister di Cultura Otmar Oduber a declara den forma di primicia na NoticiaCla.com diasabra mainta cu Cuerpo policial mester carga su responsabilidad cu a caba cu carnaval. Segun e mandatario, e no ta nada contento. “Absolutamente cu no. Y no ami so. Henter gobierno” Oduber a bisa, indicando cu “aparentemente no tin respet ni pa gobierno” Oduber a sigui bisa. “Hopi cla, gobierno a duna di conoce na cuerpo policial, cu mester wanta cualkier dunamento di permiso te ora cu caba di haya e consehonan necesario. Pa loke ta su proximo paso, e no kier a duna mas comentario e momentonan aki. Loke si NoticiaCla.com a compronde cu e mandatario ta pone un punto tras di e asunto aki.

Tabata diabierna atardi ora cu a bira conoci cu ta Stichting Arubaanse Carnaval (SAC) ta esun cu a haya e permiso otorga pa polis, pa organisa e evento apertura di 11 - 11 - 2014. NoticiaCla.com a comproba esaki diabierna atardi laat. Despues cu NoticiaCla.com a  haya confirmacion mas prome di presidente di SAC, Tecla Kelly cu e lo a haya e permiso, e la invita NoticiaCla.com pa wak e permiso, y despues di basta insistencia, a permiti NoticiaCla.com saca potret como prueba. A usa un matutino di diabierna, netamente pa mira cu e potret ta saca di diabierna, y cu e permiso ta actual. Mientras cu no a saca potret di e firma di e comisario cu a firma esaki, NoticiaCla.com tabata testigo di esaki tambe y por verifica cu e permiso ta enberdad firma y e fecha riba cual e la wordo firma. NoticiaCla.com a tuma contacto cu Alto Comisario di polis Dolfi Richardson, cu a prefera di no papia riba e asunto aki ainda. Pero hecho ta keda cu e permiso ta duna, y cu den e caso aki, SAC tin e permiso firma pa organisa e apertura di carnaval. 

Tabata algun ora prome cu NoticiaCla.com a presenta e informacion cu e permiso di carnaval 61 a bira un discusion desde diabierna merdia, ora cu noticia a cuminsa core diabierna merdia cu Stichting Arubaanse Carnaval lo a haya permiso pa organisa e evento di 11-11 otro luna. NoticiaCla.com a wordo acerca door di gobierno mesora, indicando cu e rumor cu ta coriendo cu SAC a haya permiso, no ta berdad. “SAC no a ricibi ningun permiso. Mando policial no a otorga ningun permiso”, e fuente (cu no kier a menciona nomber) a sigura NoticiaCla.com. Algun rato despues presidente di SAC, Tecla Kelly mes a tuma contacto cu NoticiaCla.com, pero cu otro version: “Mi tin e permiso. Mi a haye y nos ta bay organisa e evento di 11-11 na Santa Cruz” Kelly a sigura NoticiaCla.com. E la indica cu no ta awe e la haya e permiso, sino varios dia atras caba. “Mi no ta bay pronkia cune. Si bo kier wak’e, bo por bin mi cas” Kelly a sigura NoticiaCla.com.

Tabata diahuebs cu e fundacion SMAC (Stichting Movemento di Aruba su Carnaval) a keda lanta oficialmente, y mes momento e pregunta di ken ta haya e permiso, a bira e topico di momento. Tabata conoci, manera cu NoticiaCla.com a raporta tambe, cu mas probable diabierna lo a bira conoci ken ta haya e permiso. Fuentenan yega na e fundacion nobo a mustra cu ta mas probable cu SMAC lo hayele, mirando cu tin mas pa gana cu esey. Di otro banda, SAC a avisa caba cu si e no hayele, nan lo bay corte. Aworaki ta conoci cu SAC, a haya e permiso inicial pa apertura di carnaval 2015.