Comerciantenan y tramitador sospechoso confronta cu yamadanan ‘getapped’

ORANJESTAD – Tur comerciante y tramitador di permiso sospecha di soborno den caso Ibis a desmenti publicamente  den Corte cu nan ta culpable. Mescos cu e prome 4 comerciantenan a haci diamars mainta, diamars atardi e otro 3 comerciante, 1 secretaria y un tramitador di permiso a para ariba categoricamente cu nan no a soborna ex minister Paul Croes. Pero cada bez Huez tabata confronta nan cu yamadanan ‘getapped’, cu ta bisa otro. E ora e comerciantenan tabata bisa cu nan no ta considera nan acto como uno di soborno. Fiscalnan tabata ‘press’ e sospechosonan pa clarifica nan declaracionan, mayoria di nan riba sumanan cu tabata involucra. 

TRAMITADOR

Diamars atardi, huez a continua cu e tratamento di e caso unda cu a tende 4 comerciante y e secretaria di Paul Croes, esta S.Arends. Huez a cuminsa cu e prome comerciante, N. Nuñez cu tabata tramitador di permiso. Su detencion di 26 dia aña pasa a hala atencion debi cu e ta casa cu palanca di AVP Gaby Werleman. Manera tur otro, Nuñez a nenga categoricamente cu el a soborna Croes of cualkier otro minister durante e period en cuestion. Huez y Fiscal a remarca cu su caso tabata un poco diferente mirando cu den caso di Nuñez, e tabata practicamente ‘desvia’ DPL completo y tabata bay straight cerca e minister pa haya su firma, pasobra e tabatin bon relacion cu e mandatario. Nuñez a desmenti y a bisa cu ta solamente esunan di e refineria tabata ‘bypass’ DPL debi cu tabatin un protocol cu tabata exonera nan di bay DPL. Pa tur otro, a usa e proceso ‘regular’. Nuñez a para ariba cu nunca e a paga ningun minister pa haya ontheffing. Sinembargo, manera cu a bin ta sosode for di comienso, Huez tabata confronta e sospechoso cu e resultado di yamadanan getapped, cu tabata duna un otro bista. Huez a puntra Nuñez con e ta splica e yamada entre e cu e minister unda cu Nuñez ta bisa cu minister ta bay wordo paga pa ontheffing. Nan lo tabata papia den code, manera 3 +1, cu ta nifica tres ontheffing pa un compania y 1 pa otro. Tambe tin yamada unda cu Nuñez lo ta deposita 2.500 dollar riba cuenta di credit card di e minister. Pero atrobe Nuñez tabata desmenti. Loke si Nuñez a admiti ta cu e tabata busca ‘donacion’ pa e mandatario, unda cu dado momento a haya donacion total di 10.000 florin di dos compania.