Huez na ex secretaria: Bende carchi di concierto cu negoshinan cu ta haya ontheffing, ta un delito

ORANJESTAD – E ex secretaria di ex minister Paul Croes, S. Arends a desmenti di a haci algo malo y illegal. E ta un sospechoso den caso Ibis y tin varios cargo contra dje so. Entre nan soborno, abuso di poder, falsificacion di document. E link di e secretaria den e caso aki ta cu su bendemento di rifa y carchi di concierto di pasco. Arends a admiti cu e tabata haci esaki, pero como un negoshi extra pa gana placa, pero nunca cu e tabata algo illegal. Segun Huez, Arends tabata probecha di esnan cu tabata bishita e minister, pa bendenan carchi di concierto of rifa. E problema segun Huez, ta cu ora cu bo bende carchi of rifa cu hende of compania cu a haya un ontheffing, e ta bira un delito, esta corupcion. Pero atrobe, Arends a wak e cos ‘otro’.

E CASO

Segun Arends, e tabata bende carchi y rifa solamente cu un grupo di comerciante amigo di hopi aña, y a menciona algun compania den e caso aki. Varios di nan, segun Arends, no a haya ontheffing, pues e no sa con e ta haci algo malo. Ademas, e tabata solamente registra e bishitanan cerca minister, pero no tabata sa ken lo tabata haya ontheffing of no. Algo cu Fiscal a cuestiona y no tabata kere. A haci mencion di un amiga cu tin negoshi di laboratorio, cu ta cumpra carchi, pero cu tambe a haya ontheffing den pasado. Arends a sigura Huez cu a bende carchi di concierto cune pasobra semper e persona a cumpra carchi. Sinembargo Fiscal a bisa di tin prueba pa medio di yamada, cu e persona tabata deposita placa pa e fundacion, bien ta di e carchinan, pero cu a cambio (e fecha ta prueba esey segun Fiscal) e persona tabata haya su cosnan. Tin un yamada getapped unda cu e persona aki ta cuestiona e intencion di cumpra carchi, siendo cu ainda su ‘ontheffing’ no tabata cla. Y asina tabatin un sin fin di caso di bendemento di rifa door di e secretaria, cu segun Fiscal, tabatin metanan corupto cune.