Garage Centraal Aruba a haci donacion di un pickup na Donkey Sanctuary Aruba

ORANJESTAD - Ayera na showroom di Garage Centraal Aruba a tuma lugar e donativo di un pickup Isuzu D-Max na Donkey Sanctuary Aruba. E fundacion aki, funda na aña 1997, tin como meta e proteccion di buriconan na nos isla. E especie aki cual pa hopi aña a funciona como medio di transportacion a ser suplanta pa autonan, y desde e momento ey a cuminsa pa nan e risico di sufri den un accident di auto ora nan subi caminda. Esaki ta agrega na casonan di buriconan cu a bira victima di maltrato. Pio ainda, durante añanan 70 un malesa casi a hiba nan extincion, lagando apenas 20 buriconan na  e tempo ey riba nos isla.

Donkey Sanctuary Aruba ta ofrece nan un lugar unda nan por biba trankil, cada burico ta haya nan nomber, y cu esey nan ta haya e cuido cu e alimentacion necesario den un ambiente rondona di naturaleza, y por tanto familair pa nan. Danki na e labor di e institucion aki, awendia mas cu 130 bestia tin refugio cerca nan.

Riba imagennan por mira e momentonan di entrega di e auto, ademas di e cortamento di bolo cu amabelmante a ser duna na Garage Centraal Aruba como gradicimento di e donativo aki. Garage Centraal Aruba ta desea di gradici Donkey Sanctuary Aruba pa nan labor, y ta desea pa nan continua cu nan trayectoria exitoso di proteha nos naturaleza.