FGCA ta organisa su di dos simposio tocante bon gobernacion

ORANJESTAD - Dia 16 di januari 2019 Fundashon Gobernashon di Calidad Aruba (FGCA) ta organisa su di dos simposio den e serie ‘Na caminda pa bon gobernashon’. E prome simposio a tuma luga na september 2017. Su intenshon primordial tawata pa concientisa comunidad di e consecuencianan serio di mal gobernashon y e necesidad di un transformashon pa bon gobernashon. Den e di dos simposio, lider di organismo importante na Aruba lo hiba palabra. Entre otro nan lo duna nan vishon of intenshon con pa aporta na realisashon di bon gobernashon na Aruba. 

CONCIENTISASHON GENERAL

Durante e prome simposio, Sra. Nelly Schotborg di e movimiento civico Fundashon Kòrsou Transparente a mustra lo dificil cu ta pa realmente traha na un manera integro. Cu ehempel simpel el a duna un imagen bibo di e dilemanan cu hende den tur tipo di posishon ta confronta. Den esey nan mester haci un escogencia conciente pa actua na un manera integro. Sra. Willeke Slingerland a describi e situashon di corupshon riba nivel mundial. El a haci esey entre otro a base di su investigashon ‘Corupshon di red’. Alabes el a mustra riba e papel special di hende muhe. Al final el a ofrece posibilidad con pa realisa bon gobernashon. Presidente di FGCA Armand Hessels a duna un impreshon di e gastonan halto di mal gobernashon. A base di varios caracteristica el a sugeri cu por distingui varios similaridad entre e gobernashon di Aruba durante e ultimo 31 aña y funcshonamento di organisashon criminal. Por aprecia tur e presentashonnan aki riba e website www.bongobernashonaruba.org

ACSHON CONCRETO

E di dos simposio ta enfoca mas bien riba acshon concreto pa mehora e situashon financiero-economico y funcshonamento di Parlamento. Tumando na cuenta e situashon financiero y socio-economico precario di Aruba, acshon decidido ta hopi importante pa realisa corecshon di maneho eroneo. Ki solushon Banco Central ta mira pa Aruba? Kico gabinete Wever-Croes tin na bista concretamente y ki consecuencia esaki tin pa comunidad di Aruba? Kico nos por spera den esey di Parlamento cu durante decada evidentemente a faya den su tarea di supervishon? Y ki papel Ministerio Publico ta hunga den esaki awor cu ta bira mas cla cu na casi tur luga na mundo, pues tambe na Aruba, gobernante hopi biaha no tin interes general como nan prioridad principal, pero al contrario ta causa hopi daño na nan pais y por wordu persigui penalmente p’esey?

INITIATIVA NOBO NA CAMINDA PA BON GOBERNASHON

Na final di e simposio lo duna informashon encuanto iniciativa cu lo por mehora calidad di gobernashon na Aruba. Tanto Universidad di Aruba como FGCA lo demostra cu nan ta hopi serio pa duna nan aporte den esaki.

AVP E GRAN AUSENTE

For di e lista di orador lo por saca e conclushon cu FGCA a invita solamente e lidernan di e partido di coalishon mas grandi. Consecuentemente e simposio lo duna e partido en cuestion un plataforma. Sinembargo, FGCA a manda for di comienso di e preparashonnan pa e simposio e mesun invitashon asta varios biaha pa lider di fracshon di AVP den Parlamento. Pasobra e intenshon ta pa e dos partidonan cu durante 31 aña a determina e conducta den un Parlamento disfuncshonal, awor lo mester pone bon cla di ki manera concreto nan lo pone Parlamento funcshona debidamente. Pero e lider di fracshon en cuestion nunca a reacshona riba e invitashon. Tampoco despues cu a propone den un combersashon hunto cu su colega-lider di fracshon pa prepara y duna e presentashon conhuntamente. Cu e actitud aki, segun presidente di FGCA, el a logra di pone cla cu su partido no ta dispuesto pa forma parti di e proceso pa logra bon gobernashon. Ta parce asina cu e partido ta prefera di atene su mes na su slogan di 1995: ‘Good governance is bad politics’. Of, cu otro palabra: tanten cu tin mal gobernashon, ta practica bon politica.