KVK: Gasto halto a pone hopi negoshi cancela su operacion na 2018

ORANJESTAD – Camara di Comercio y Industria (KvK)  a compila informacion saca for di e registro di negoshinan. For di e datonan cu a colecta KvK por haci un analisis pa duna un indicacion con e situacion comercial di Aruba a desaroya durante 2018. A base di e informacion di e registro por mira cuanto negoshi nobo a habri indicando e interes y oportunidadnan comercial di e empresario y di otro banda a base di cancelacionnan por observa e fluho di negoshinan cu a sera nan porta durante e aña. Na momento cu un empresario bishita KvK pa sera su negoshi, e ta wordo pidi pa yena un formulario pa completa e formalidad di sera e negoshi. Den esaki ta pidi tambe pa duna un breve descripcion di e motibo tras di e cancelacion. E informacion aki ta keda confidencial y e ta importante pa por trece claridad di e motibonan cu ta reina y di e forma aki bin cu solucion pa mitiga e cantidad di cancelacion y yuda mantene negoshinan activo.

Registracion di negoshinan durante 2018

Awo cu 2018 ta tras di lomba, KvK tin e cifras di december tambe y por haci un comparacion completo di 2018 cu 2017 pa asina duna indicacion di desaroyo di e registro di negoshi na Aruba.

For di e datonan ta sali cu durante 2018 a registra un total di 1309 empresa. Di e total aki tin 144 NV, 1 AVV, 437 VBA, 687 propietario unico (eenmanszaak), 23 VOF y 17 cu ta otro categoria. Durante 2018 tabatin solamente 1 registracion di e tipo di empresa AVV y esaki ta tambe e unico offshore registra. Den 2018 KvK ta observa un total di 836 empresa cu a cancela nan registracion. Di esaki tin 101 NV, 50 AVV, 35 VBA, 626 propietario unico, 17 VOF y 7 cu ta otro categoria.

Si haci un comparacion cu e aña anterior nos por observa lo siguiente:

Registracion 2017            Registracion 2018            Cantidad di 2018 compara cu 2017:

NV      177    NV      144    33 menos

AVV   4         AVV   1         3 menos

VBA   424    VBA   437    13 mas

Eenmansz    699    Eenmansz    687    12 menos

VOF   14       VOF   23       9 mas

Otro   32       Otro   17       15 menos

Total  1350Total  130941 menos 

Por observa cu e registracionnan pa un negoshi nobo den su totalidad ta menos den 2018 compara cu 2017. Esaki ta conta pa tur tipo legal cu excepcion di VBA y VOF cu a mira mas registracion durante aña 2018 compara cu 2017. Ora observa e cancelacion por mira lo siguiente:

Cancelacion 2017Cancelacion 2018Cantidad di 2018 compara cu 2017:

NV      105    NV      101    4 menos

AVV   73       AVV   50       23 menos

VBA   18       VBA   35       17 mas

Eenmansz    502    Eenmansz    626    124 mas

VOF   8         VOF   17       9 mas

Otro   9         Otro   7         2 menos

Total  715    Total  836    121 mas 

Motibonan pa cancela negoshi

For di e cifras di cancelacion por mira un crecemento den negoshinan cu a cera durante 2018. Pa por haya un bista kico por ta e motibo di esaki a analisa e contestanan cu a wordo yena. Durante 2018 e motibo principal pa cera negoshi ta e gastonan halto pa mantene negoshi. Na 2017 e motibo principal tabata cu no tin actividadnan comercial pa por mantene un negoshi activo. Tin varios motibo cu no ta mucho frecuente y a wordo poni bou e titulo “otro motibonan”. Bou esaki por menciona motibonan manera motibo personal, cancelacion di projecto, bende negoshi, problema cu adres of localidad.

Motibonan pa cancela    Candidad representa na 2018Cantidad representa na 2017

Gastonan halto pa mantene negoshi           21.5%           15.8%

No tin actividadnan comercial mas    20.6%           30.2%

Cambio di entidad legal              17.2%           17.7%

Falta di financiamento                12.7%           13.4%

Competencia                                              8.7%  9.3%

Motibonan di salud                                 6.1%  5.6%

Otro motibonan                           4.6%  2.2%

No tin permiso of contract                    4.2%  3.2%

A haya trabou vast o estudio               1.7%  1.6%

Inmigra for di Aruba                                1.6%  -

No tin tempo pa dedica na negoshi   1.1%  1.1%

A base di e cifras ta mustra cu durante 2018 e empresario tin hopi cautela ora di habri negoshi. Tin menos negoshi nobo registra durante 2018 compara cu 2017 y e cantidad di cancelacion a crece.  Ademas hopi negoshi di e tipo propietario unico a cera. E tipo aki ta e grupo di mas grandi y ta esun cu ta contribui na gran parti na e economia y sector laboral di Aruba. 

Hermana isla y region

Dato cu nos a colecta di CBS di Corsou ta indica cu negoshinan di nos hermana isla tambe ta sinti cu nan ta haya nan mes cu obstaculonan pa haci inversion. Indicadornan principal ta falta di financiamento y e expectativanan di e mercado local. E factornan aki ta acopla 50% di respondientenan di un encuesta haci na Corsou. E confiansa durante e ultimo añanan tambe a keda disminui den ultimo paar di aña. Na Corsou tambe a experiencia un caida den nan GDP y e contribucion negativo ta principalmente  door di confiansa y falta di servicionan financiero, hunto cu salarionan abou y gastonan halto. Comercio a krimp den benta tanto den wholesale como retail. Turismo den forma di restaurant y hotel ta contribui positivamente na e GDP di Corsou pa 2018. Situacion di Venezuela tambe ta hunga un rol cu ta impacta economia y comercio di Aruba. Un parti importante di turismo di Aruba a sufri un caida e ultimo añanan caminda no ta yega e cantidadnan di bishitante procedente for di Venezuela cu ta inverti den nos economia. KvK ta tene na bista e desaroyonan den nos region y ta duna su aporte na e comerciante local pa por mantene negoshinan activo na Aruba.