Huez a cuestiona Paul Croes di su ‘maluso di poder’ como minister

ORANJESTAD – Ex minister Paul Croes a malusa su poder di minister, cu ta un di e cargonan cu e ta wordo acusa di dje. Durante e caso cu a cuminsa dialuna, huez a puntra Croes dialuna mainta, riba esaki. A confronta Croes cu varios caso specifico, y a puntra Croes kico su pesamento ta riba dje. Entre nan, pa prohibi Kock di DAO pa haci investigacion riba cierto restaurant, manera esun di 297. Croes a sigura cu e no ta considera esey como metemento y abuso di poder. Ta simplemente kier a evita cu tin inval na lugarnan cu e ta bishitando, pa hende no kere cu e ta envolvi den esey. Entre nan e restaurant 297. Huez a cuestiona Croes y puntre pakico ta necesario pa yama e hendenan ey. “Bo tin cu djies laga nan haci nan trabou” Huez a bisa. 

HARMONY SUPERMARKET

Un otro caso cu Huez a cuestiona Croes, ta e parti unda cu e lo a yama doño di Harmony Supermarket riba un caso di trahadonan cu no por traha eynan. Huez a puntra Croes kico e sa di e yamada di e doño di e supermercado pidiendo Croes personalmente pa para controlnan. Segun Croes, esey no ta loke a sosode, sino mas bien a alerta cu no por tin trahado eynan cu no tin permiso pa traha eynan. A mustra cu tin trahadonan cu tin permiso di trabou, pero no pa eynan y esey tabata e problema. Pero no cu el a yama pa para e razzia eynan. 

CASO DI WINE & DINE

Huez a mustra Croes riba e caso di Wine & Dine unda cu e doño, Koeman lo a paga 10.000 florin na Croes pa ontheffing. Huez a recorda cu a ‘tap’ telefon di Croes durante e periodo di investigacion, unda cu ta tende Koeman bisa Croes pa bay Hyatt tene razzia pasobra tin yen di persona cu no por traha eynan. Croes a admiti e combersacion pero cu nunca e razzia ey no a tuma lugar. Segun Croes, hopi cos por wordo papia, pero esey no kier men cu en realidad esey a sosode. 

REGLA PERMISO PA LIVE IN

Un asunto tambe cu Huez a remarca, ta e yamada cu el o a haci na e hefe di grenspolitie, sr Vingal ora cu e persona cu mester a bin traha na nan cas, no por a drenta Aruba. Croes a admiti cu enberdad el a yama Vingal, pero no pa orden’e pa lag’e drenta, sino pa wak kico ta e situacion y pa wak kico e proceso tabata y con e asunto tabata hinca den otro. Aki Huez a hala atencion di e ex mandatario. “Pakico bo tin cu yame. Laga e homber haci su trabou” Huez a bisa Croes den corte. Pero e asunto no a para aki. E casa di Croes a cay aden splicando Huez cu tabatin problema pa haya hende.

PROBLEMA PA HAYA HENDE

E casa di Croes, Melony Paesch a splica huez den luho y detaye cu e loke cu a sosode ta cu no tabatin otro forma pa logra haya e señora pa bin traha na e cas. “Sr Huez, splicami con otro mi por haya e persona traha na mi cas” Paesch a bisa huez. E problema ta cu a laga e dama bin traha na Aruba sin cu su permiso tabata na ordo. Pero segun e casa, ta pasobra e situacion na Venezuela (e dama ta di Venezuela) tabata bruha y no por a haya cierto stempel cu tabata falta. Ademas, basa riba mal experiencia cu nan tin cu otro ayudo den cas, nan kier a duna e persona aki un ‘proeftijd’ pa wak si e ta resulta. Y nan no por a keda sin paga e persona aki. Huez a hala atencion di Paesch, bisando cu e forma con e mester a atende cu e asunto, ta cu e dama mester a warda su permiso na Venezuela, y no por a traha y wordo paga, sin cu e tin permiso. E casa a sigura cu no tabatin otro forma.