Croes a admiti di a usa fundacion pa paga su debe di estudio

ORANJESTAD – Paul Croes a usa su fundacion ‘Leadership in Excellence’ pa entre otro caba paga su debe di 16000 mil florin di estudio, un di su airconan na su cas, y debenan di su creditcard. Asina e ex minister a admiti dilanti huez dialuna durante e prome dia di e caso Ibis, unda cu banda di Croes, tin 22 sospechoso cu lo keda trata pa e.o corupcion y malversacion. Ministerio Publico ta acusa Croes di malversacion di fondo, door cu e la usa su placa pa metanan priva envez di pa metanan di e fundacion. Croes sinembargo ta sigura cu e tabatin un bon motibo pa haci tal. Ta keda na huez si e ta kere Ministerio Publico of Croes. 

FUNDACION

Segun Croes, e acusacion di malversacion no ta corecto. E ta considera cu pagamento di su debe pendiente, a ‘yuda evita cu e lo a haya un mal imagen politico’ pasobra lo por a pone beslag riba su salario. Y como politico prominente, esaki lo tabata funesto pa su carera. Un sentencia algun aña atras a exigie pa e paga e suma di 16.000 den un solo tiro, sino e mester a sufri e consecuencia. Esey a pone Croes delibera cu miembronan di su fundacion pa haci e pago e ora. Segun Croes, meta di e fundacion toch ta pa e.o. percura pa e imagen di dje como politico. Y scapa un berguensa asina, ta cay den e scope di meta di e fundacion, pues como tal el a kere cu ta bon el a haci. E parti di airco, tambe tabata pa metanan politico pasobra el a bay usa parti di su cas como cede y a usa e placa pa esaki tambe. E ultimo parti di usa e fundacion pa paga su credit card personal, tambe Croes considera como al normal, mirando cu e tabata usa su credit card pa encuentronan y cenanan politico pues esey tambe tabata cumpli cu e meta politico. Ministerio Publico ta pensa otro y ta mustra cu el a malusa fondonan di e fundacion y como tal ta considere como ‘malversacion’.