OM: Ex minister Croes a usa fundacion pa laba minimal 539 mil florin

ORANJESTAD – Ex minister Paul Croes y su casa Melony Paesch a laba minimal 539.000 florin na placa, aunke cu nunca lo por sa cuanto placa a keda ‘laba’. Asina Fiscal Gerritsen di Ministerio Publico a bisa durante su presentacion dialuna den e caso Ibis. Segun e Fiscal, a usa e fundacion di Croes pa haci e actonan aki, y e tiendanan di e casa. Aki a haci compra pa cierto suma, pero pa cual a ricibi sumanan hopi mas grandi. Algo cu tanto Croes como su casa a refuta durante nan presentacion dialuna mainta. 

ACTUA CONTRA MINISTER

Segun e fiscal, algun tempo despues cu Croes a bira minister, tabatin rumornan cu e tabata laga su mes wordo cumpra pa fabor politico. Pero OM por a actua solamente ora cu dos ambtenaar a haci denuncia di e cargonan, cu a duna OM e derecho pa cuminsa cu e investigacion. Un investigacion cu a cuminsa di 1 di september 2016 y a caba 28 di maart 2017 cu inval na cas di Croes. Tur esaki den tur secrecia, unda cu a usa tur sorti di metodo, manera tap telefon, pa yega na e informacion. 

CARGONAN

Mientras cu varios di e cargonan ta conoci caba, tin algun cu a resalta durante e tratamento di e caso, manera e suma di mas di mei miyon cu segun OM, a keda ‘laba’. Tambe loke a resalta ta e cantidad di ‘ontheffing’ cu a tuma lugar. Ta haci mencion di entre 1900 ontheffing cu a tuma lugar den un periodo na 2015, conforme informacion director di Dimas, aunke cu Croes ta sigura cu tin varios tipo di ontheffing, y cu e so no a haci esaki pero cu ta OM ta ‘pega tur cos na otro y pinta Croes preto’. 

PROCESO DI PERMISO

Fiscal no por bisa cuanto ontheffing a tuma lugar, pa cual Croes a haya un suma di placa of otro fabor. Como prueba, tin envelopnan cu nan a haya durante razzianan, cu ta di un di e tramitadornan di fam Filiciana, riba cual ta para cua parti di e placa a bay pa e ex minister. Huez a puntra si ta berdad si e sumanan ta yega entre 50 pa 80 mil florin, y Filiciana a bisa cu nan tabata hopi pero no ta corda e suma exacto. Durante e caso, tabatin discusion entre e otro sospechoso Schwengle, cu a desmenti tur loke a wordo bisa door di Filiciana y dado momento el a bira un discusion entre nan dos. A hinca e dama Vazquez aden cu segun su version, a wordo usa pa Filiciana, cu tabata abusa di e negoshi cu Vazquez tabata maneha. Asina Filiciana tabata supuestamente fix permiso di trabou pa negoshi di Vazquez sin cu nunca e trahadonan tabata aparece eynan. Vazquez tambe ta un sospechoso y a sinta castigo di prison, aunke el a sigura dialuna cu el a wordo usa pa Filiciana sin cu e tabata na altura.   

CORUPCION

Segun Fiscal, ‘ambtelijke corruptie’ conoce dos partido. E persona cu ta viola e integridad y ta laga su mes wordo cumpra door di esun cu ta haci e acto. Fiscal a manda un mensahe pa tur ambtenaar: No haci bo mes culpabel na soborno. Otro siman dialuna defensa di Paul Croes y Melony Paesch ta tuma lugar den Corte.