Ex minister Croes a para tres ora dilanti huez awe mainta

ORANJESTAD – Awe mainta durante tres ora para dilanti huez, ex minister Paul Croes a insisti cu e ta inocente di tur loke e ta wordo acusa di dje den e caso Ibis, y cu ta Ministerio Publico ta interpreta informacionan acumula robes y usa e informacion na nan fabor. Durante e caso grandi unda cu tin 23 sospechoso, di cual Croes ta esun principal, ministerio publico tin cu comproba culpabilidad di e ex mandatario y e otro sospechosnan di e.o. corupcion, labamento di placa y malversacion. 

E CASO

Huez a habri e caso pa 9:05am den presencia di por lo menos 5 otro sospechoso y nan respectivo abogado. E scenario tabata prepara cu 23 stul, tur dilanti e huez, aunke cu pa e prome mainta, esakinan a keda completamente bashi, siendo cu ta solamente e sospechoso principal, Paul Croes y su casa Melony Paesch tabata esnan cu huez y Ministerio Publico a atende cune. A reserva henter un otro sala extra cu pantaya pa por a sigui esaki, en caso tabatin hopi hende, pero esaki a resulta minimal. Pa loke ta e caso, Fiscal Gerritsen a mustra cu mientras cu tabatin hopi indicacion di cosnan robez, via postings riba facebook y otro fuente, ta ora cu dos persona a haci denuncia, cu e investigacion gigantesco por a tuma lugar. Un investigacion ‘scondi’ durante casi un aña, unda cu a tap telefon, persigui e famia y haci varios inval, cu e fin pa acumula informacion necesario. Huez a duna Croes oportunidad pa hiba palabra tambe, loke a resulta den un intercambio di palabra di por lo menos 3 ora entre Huez, Fiscal y Croes, unda cu tanto Huez como Fiscal a interoga Croes y su casa riba varios di e puntonan specifico. Esaki mientras cu e abogadonan di e pareha, Marije Vaders y Demis Illis tabata sinta ta scucha. 

DECLARACION CROES

Prome parti di Croes su declaracion tabata con el a experencia e situacion cu el a haya su mes aden. Parti di e splicacion tabata un ripiticion di su prome aparicion den corte aña pasa ora cu tabatin e prome regie zitting. Loke a resalta e biaha aki, ta cu tanto Croes como su casa, ta bou tratamento psycologico, y cu contrario na instancianan anterior, e biaha aki nan tur dos a papia abiertamente riba nan caso. Esaki awor si pasobra anteriormente nan no tabatin confiansa den Ministerio Publico. Aki tanto Croes como su casa a haci algun declaracion cu nunca antes nan no a haci, cu a pone Fiscal cuestiona esaki. “Nos no ta confia boso, pesey” tanto Croes como Paesch a responde Fiscal. “Nos no tabatin confiansa den e proceso. Nos tin confiasa den bo persona” Croes a bisa e Huez dado momento. Durante curso di e caso, tabata notable e cambio di tono y apariencia di Croes, cu tabata visiblemente indigna cu e forma di proceder di Ministerio Publico. 

ONTHEFFING

Huez a puntra Croes pa splica e.o. e proceso di ontheffing y con e ta splica tur e acusacionan cu tin den su contra riba e tema aki. “Con bo ta haya e imagen cu Ministerio Publico tin dibo”? Huez a puntra Croes dado momento. Croes den su splicacion a mustra cu semper el a actua conforme su consenshi y a purba di haci lo mas corecto, pa medio di su fundacion ‘Leadership In Excellence’, pero awor ta resulta cu esaki a bira su ‘downfall’. El a splica di e cultura politico na Aruba, su diferencia cu Hulanda y con e ta funciona pa cu su funcionamento como minister. Y a purba duna un splicacion riba e donacionan cu el a ricibi, sea ta pa e fundacion como compra di carchi pa concierto organiza, sumanan di campaña y te hasta cahanan di cerbez cu el a solicita pero cu nunca el a ricibi. Tur esaki awor ta den contra di Croes, unda cu ta culpe di a laba placa, comete sobordo, y mas. Huez dado momento a mustre cu hopi biaha e lo tabata actua den cosnan cu e no mester a actua, y cu facilmente hende por compronde cu su accionan, aunke cu bon intencion, por conduci of crea e duda  y speculacion pa cu actonan coruptivo. “Bo mester a djis laga hende haci nan trabou” e Huez a bisa. Segun e Huez, Croes tabata mete mucho hopi personalmente, unda cu por sali na cla cu e tabata instrui y of obstaculiza cierto procesonan di cana camindanan normal. “Bo ta compronde cu hendenan kier of ta sinti cu nan tin cu coopera cubo, a cambio di fabor, of simplemente pa ‘keda bon cu minister?” Huez a sigui bisa. 

CASONAN SPECIFICO

Huez despues, usando casonan specifico, a para cerca cada uno y a cuestiona Croes riba nan. (NoticiaCla lo bin riba esaki mas extensor despues). Entre otro e parti cu Croes lo a abusa di su poder como minister (machtsmisbruik), y unda e Huez a usa e caso di e ex restaurant 297 pa proba su punto. Aki Croes a splica cu el a duna orden berdad cu ora cu e ta come na un cierto restaurant, incluyendo 297, cu e no kier pa tin accion eynan (razzia), pa hende no kere cu e ta esun responsabel pa e accion of razzia. Den caso di culpabilidad di malversacion, Croes mester a contesta Huez con el a actua cu e fondonan adkeri pa medio di e fundacion di dje. Aki Croes a admiti di a usa fondonan di e fundacion pa finnan personal, pa e.o. paga pa cancela debe di su estudio, y tambe compra di airco, pero  cu tabata pasobra e tabata usa esaki pa asuntonan politico. Tambe pa cancela su creditcardnan personal, pasobra e lo tabata usa esaki pa motibonan politico. Tambe tin e caso di labamento di placa, unda cu Croes mester a splica e sumanan cuantioso cu e tabata saca pa compra di cos. Aki Croes a bolbe referi na e hecho cu e tabata haci esaki pa finnan politico. A cuestiona e hecho cu Croes no a haci mencion di un herencia cu el a haya y aki Ministerio Publico a cuestiona Croes pakico ainda no a duna cuenta di esaki y ta warda te ora cu Ministerio Publico sugeri pa esaki sosode. NoticiaCla lo bin bek riba varios aspecto di e caso den otro articulonan. Huez ta continua trai merdia cu e caso, scuchando varios di e otro sospechosonan, incluyendo Paul Croes tambe. Pa resto di siman Huez y Fiscal lo trata e caso cu e otro sospechosonan y diabierna Fiscal lo presenta su demanda. Dialuna otro siman Croes y otro sospechosonan lo presenta nan defensa. E caso ta programa pa tuma lugar di awe te dia 31 di januari proximo.