Hotelnan All Inclusive mas afecta pa impuesto extra riba alcohol

ORANJESTAD – Hotelnan All Inclusive na Aruba ta esnan mas afecta pa e impuesto extra riba alcohol, segun CEO di AHATA Tisa LaSorte. E ta contesta NoticiaCla asina riba e tema di introduccion di e asina yama ‘sin taxes’, esta impuesto riba cosnan ‘ bicioso’ manera alcohol y sigaria cu a drenta na vigor comienso di e aña aki. Mientras cu e no kier causa alarma,  LaSorte ta mustra pues cu e lo tin su efecto. Segun   LaSorte, Aruba ta caro caba turisticamente, y cu aumento di prijs di alcohol extra aki, e turista lo reacciona riba prijs aun mas halto. E ta bisa cu ultimo añanan tabatin un preocupacion caba cu haci negoshi ta birando mas y mas caro. 

ALL INCLUSIVE

Manera indica caba, LaSorte ta mustra cu e grupo mas afecta ta esun di turista pa e Mercado di All Inclusive, esta e hotelnan (propiedad) cu tin e concepto di inclui alimento y bebida den e tarifa di hotel. E hotelnan aki awor ta haya nan mes cu gastonan extra, cu no tabata conoci antes, siendo cu nan productonan t­­a prepara y estableci un aña delanta. Pues mientras cu e tarifanan awor a subi, nan no por cambia esaki pa cu e turista diripiente, pasobra e ta ‘inclui’ den algo cu nan a paga delanta caba. “E tarifa ta contrata pa e aña delanta. Y esaki ta nifica cu Aruba ta bira aun mas caro pa e turista, mientras cu competencia den e region ta aumentando” LaSorte a sigui bisa. 

COMPETENCIA

Den articulonan anterior, AHATA a mustra caba cu e aña aki, competencia den region ta aumenta debi na e hecho cu varios propiedad y isla a recupera di dañonan di horcan, y ta habriendo pa negoshi. Esaki ta nifica cu tin mas alternativa pa e turista. Y pa logra haya e turista bek, no ta descarta cu lo tin un tarifa mas atractivo, cu por afecta nos isla turisticamente.