Dialuna caso contra e.o. ex minister Croes ta cuminsa

Dialuna caso contra e.o. ex minister Croes ta cuminsa

Posted on 01/12/2019 10:21 am AST | Updated on 01/13/2019 5:59 pm AST

ORANJESTAD – Dialuna mainta Corte ta cuminsa trata e caso penal contra ex minister Paul Croes y e otro 23 sospechosonan den loke ta conoci como e caso Ibis. Vocero di ministerio publico Ann Angela a confirma diasabra pa NoticiaCla cu tur cos ta cuminsa dialuna awor 9’or di mainta y lo dura te cu 31 di januari mirando e embergadura di e caso. E sospechoso principal den e caso aki ta e ex minister Paul Croes. Abogado di Croes, Demis Illis diasabra a confirma cu si tur cos cana bon, diamars e ta cuminsa cu defensa di su cliente.

FECHANAN

E periodo di casi dos siman  (14 januari pa 31 di januari 2019) ta debi na e embergadura di e caso, unda cu tin cu trata no menos cu 24 sospechoso. Riba e comienso di e caso, esta 14 di januari 2019, lo cuminsa trata e hechonan y circumstancia cu lo dura te 17 di januari. Fiscal lo presenta su demanda di 18 pa 21 di januari, sigui pa e defensa cu lo bin na turno entre 22 y 28 di januari (22, 24 y 28). E parti di repliek y dupliek (contestanan y pregunta) lo sigui dia 29 y 31. Y ta premira cu pa fin di februari 2019, huez dicta un sentencia.

ENTRADA HUDICIAL

Tur cos a cuminsa dia 28 di maart 2017 ora cu autoridad hudicial a tene un entrada hudicial na cas di e ex mandatario. Mientras cu no a pasa pa su detencion e dia ey, oficialmente ministerio publico a informa cu e awor ex mandatario a bira un sospechoso  di corupcion y malversacion di fondo. Fiscal mayor Erick Olthof e tempo ey a specifica cu e awor ex mandatario ta wordo sospecha di a acepta regalo, promesa y of servicio relaciona cu e mercado laboral, conduciendo na e hecho cu stranheronan por a haya permiso di trabou. Hunto cu ne tabatin un lista di persona mas cu tambe a haya e ‘label’ di sospechoso.

DETENCION

Ta despues di 5 luna cu autoridad hudicial a tuma e paso cu hopi a spera, esta detencion di e awor ex mandatario Paul Croes.  Cu e detencion, a presenta e cargonan pa cual e awor ex mandatario a keda deteni. E seis cargonan contra Croes ta entre otro, “ambtsmisbruik conhuntamente cu otro of otronan den e periodo di 20 di april 2015 te 30 di januari 2017, malversacion conhuntamente cu otro of otronan di placa di e fundacion S.L.&E. den e periodo di 18 di december 2014 pa 28 di maart 2017, labamento di placa (gewoonte witwassen) conhuntamente cu otro of otronan den e periodo di prome di januari 2014 pa 28 di maart 2017, empleo di un persona indocumenta conhuntamente cu otro of otronan den e periodo di 20 di december 2016 te 28 di maart 2017. Pone un persona den ocasion pa e viola LTU den e periodo aki. Mas subsidiario, laga un persona indocumenta traha, participacion na un organizacion criminal den e periodo di prome di januari 2014 te 28 di maart 2017.

PROCESO

E awor ex mandatario despues di 3 luna deteni, a recobra su libertad dia 14 di November 2017, pendiente tratamento di su caso. A sigui un silencio casi hermetico di banda di e awor ex mandatario. Pero 6 luna despues, hopi informacion a bin dilanti. Esaki ora cu dia 23 di mei di e aña aki, e awor ex mandatario y su casa a aparece dilanti mesa berde den un asina yama regie zitting. Durante e proceso aki a stipula kico tur a tuma lugar y kico mas falta. Mientras cu regiezitting ta algo basico y sin mucho detaye, e interes pa esun aki tabata sumamente grandi, mirando cu ta prome biaha cu lo a mira e awor ex mandatario publicamente declara algo posiblemente. Y el a declara tambe, tanto den corte como pafor di corte. Aki el a insisti riba su inocencia y tabata mira dilanti pa e caso bin dilanti. E fecha awor, ta conoci. Despues di 8 luna di e regiezitting, e awor ex mandatario lo presenta dilanti mesa berde pa haya sa su destino finalmente di un caso cu tin mas di 2 aña andando. NOTA: E potret ta di archivo di NoticiaCla dia cu ex minister Paul Croes a presenta na e regie zitting.

 

 

  • Fiscal a pidi 5 aña di prison pa ex minister Paul Croes den caso Ibis

    Fiscal a pidi 5 aña di prison pa ex minister Paul Croes den caso Ibis

    ORANJESTAD – Ministerio Publico a pidi 5 aña di castigo di prison pa ex minister Paul Croes pa e caso Ibis, y 240 di trabou comunitario pa su casa Melony Paesch. Aparte di e castigo di prison, a pidi pa e no eherce ningun funcion politico pa por lo menos 10 aña. Fuera di Croes, a pidi castigo di prison pa solamente dos sospechoso mas di henter e lista di 23 sospechoso, esta tramitador Filiciana y comerciante Schwengle y pa e resto, ora di trabou entre 30 pa 240 ora di trabou.  

  • Ex minister Croes: ‘Si ta pa e hendenan aki mi mester haya cadena perpetuo’

    Ex minister Croes: ‘Si ta pa e hendenan aki mi mester haya cadena perpetuo’

    ORANJESTAD –Segun ex minister Croes, si ta pa ministerio publico, e mester haya cadena perpetuo den prison. Asina e ta bisa den un comunicado dialuna atardi, como reaccion riba e formulacion di castigo tanto p’e como su casa den e caso Ibis. Ministerio Publico a pidi 5 aña di castigo di prison p’e y 10 aña for di politica, mientras cu pa su casa, 240 ora di trabou comunitario. Segun Croes den su comunicado, cu un tono bastante indigna Croes a cuminsa na bisa cu “Mi no a horta placa di pueblo, mi no a mata niun hende tampoco a abusa di mucha. Si ta pa e hendenan aki mi mester haya cadena perpetuo" tabata prome declaracion di Croes despues di a scucha exigencia di OM. Esaki ta den e forma cu Ministerio Publico a actua desde inicio. Nan a drenta cu cacho dos biaha riba mi juinan 6or di mainta, a serami manera un terrorista den isolacion 80 dia, niun caso den reino esaki no a sosode nunca. Esaki simplemente pa colga Paul Croes". Segun Croes, e motibo cu e ta aki, ta pasobra e fiscalnan di Ministerio publico kier sigui hasi malusa nan poder y a busk’e pa colga. “ Si loke mi a haci, contrario na tur otro politico y partido , di lanta un stichting pa maneha donacion pa mi campaña politico transparentemente y nan kier hincami den prison pa esey, anto ta tur nan lo mester bay husga. Esaki ta malicia y e intencion di e hendenan ki a cuminsa cune. Nan a acusami di abuso di poder, ami ta puntra mi mes, na unda mi derechonan como ciudadano a keda anto” Croes a sigui bisa den e comunicado. “Diaranson, mi abogadonan lo splica den detayes na e huez imparcial aki, con di berdad mi caso a cana, y mi kier keda reiteira cu mi no a hasi locual mi ta acusa dje”. Na final Paul Croes a mustra di kier mustra respet pa e juez y laga na final e desicion den su man.

  • OM a pidi 100 luna di prison y 2510 ora di trabou comunitario den caso Ibis

    OM a pidi 100 luna di prison y 2510 ora di trabou comunitario den caso Ibis

    ORANJESTAD – Ministerio Publico a pidi en total 2510 ora di trabou comunitario reparti entre 20 persona sospecha den e caso Ibis dialuna. Fuera di esey, OM a pidi 100 luna di castigo di prison reparti den 3 persona, incluyendo e sospechoso principal, ex minister Paul Croes. Como tal por nota cu ningun di e sospechosonan a scapa di haya un castigo pidi pa Ministerio Publico. 

  • OM den rekisitorio: Comercianternan cu a soborna minister, lo no bay prison

    OM den rekisitorio: Comercianternan cu a soborna minister, lo no bay prison

    ORANJESTAD – E grupo grandi di comerciantenan y otro persona cu a soborna e ex minister Croes, enberdad a comete algo criminal. Door di paga ‘placa sushi’ na un minister, bo ta mantene e sistema corupto na bida, ministerio publico ta splica den e rekisitorio di e caso Ibis (cu NoticiaCla tin den su poder). OM ta pensa cu e tipo di corrupcion den principio, ta hustifica un castigo di prison. Pero segun fiscal ta bisa den e rekisitorio, lo deshaci di e pensamento ey awor, pasobra ta trata di ‘first offenders’, esta hendenan cu a comete un ofensa criminal pa prome biaha , y cu e caso tabatin un impacto grandi riba nan bida. “Laga e ta un aviso si pa tur comerciante y ciudadano di Aruba.  E tipo di practica aki ta trece hopi problema pa esnan cu a soborna y nan famia. Pues ta parse cu e grupo aki, lo ‘scapa’ di un sentencia di prison. Sinembargo, manera indica den un articulo anterior, tanten cu e parti aki di e rekisitorio no ta lesa den corte, e no ta ‘valido’. Y na final, fiscal por cambia di idea y huez tambe por opta pa tuma un rumbo diferente. 

  • Fuera di Paul Croes, lo pidi castigo pa mayoria sospechoso den caso Ibis

    Fuera di Paul Croes, lo pidi castigo pa mayoria sospechoso den caso Ibis

    ORANJESTAD – Ministerio Publico ta considera e grupo di sospechoso den caso di Ibis, den e caso aki esnan cu ta sospecha di ta parti di un organisacion criminal (por lo menos 3 pa 4 sospechoso), di ta un grupo di persona cu a probecha di comunidad di Aruba. Pa nan tambe lo tin un castigo posibel, aunke obviamente menos cu e sospechoso principal, ex minister Paul Croes. Asina fiscal ta splica den su rekisitorio.  Den caso di Paul Croes ta haci mencion specifico di castigo di prison. “Nan a profita di un forma sin berguensa, di e practica malo di ex minister Croes, y a haci esaki tambe posibel. Obviamente nan parti tabata mas chikito, pa cual nan castigo lo ta menos tambe” Fiscal ta sigui bisa. Como tal e rekisito pa castigo lo ta considerablemente mas abou. E rekisitorio no ta specifica si ki tipo di castigo ta spera nan. “Aki tambe OM ta tene cuenta cu e falta completo di vision y arrepentimiento”.

  • OM lo sugeri un castigo di prison pa ex minister Croes di mas di 3 aña

    OM lo sugeri un castigo di prison pa ex minister Croes di mas di 3 aña

    ORANJESTAD – Ex minister Paul Croes lo por haya un castigo di mas di 3 aña di prison, si ta pa ministerio publico. Asina e fiscal ta relata den e rekisitorio amplio. Mientras cu pa motibo di tempo, fiscal no a logra yega na formula e castigonan pa ex minister Paul Croes oficialmente y e otro sospechosonan den caso Ibis, e rekisitorio di fiscal di 171 pagina ta sugeri den ki direccion ministerio publico lo bay. Esaki pasobra den e parti di motivacion di castigo, nan ta haci mencion di un castigo di prison di sigur mas di tres aña di prison. Mester bisa si cu ainda e parti ey, no a keda presenta publicamente ya cu e ta casi na final di e rekisitorio. Mientrastanto a pone un dia extra pa ministerio publico por continua cu nan rekisitorio, cu ta dialuna awor. Unabez cu caba cu esaki, lo formula e castigonan cu kier pidi huez pa duna e sospechosonan.

  • Powered by SETAR