Xander Bogaerts a firma cu Red Sox pa 12 miyon pa keda un aña mas

ORANJESTAD / BOSTON – Un dia despues cu su mama a firma pa e bira parti di imagen di Aruba internacionalmente, Xander Bogaerst a firma un contract cu Boston Red Sox diabierna pa 1 aña, balora na 12 miyon dollar. Asina Boston Globe ta raporta. E placa ta un aumento substancial di e 7 miyon dollar di e temporada anterior, y ta bisa cu el a logra esaki danki na su prestacion di e temporada ultimo. Aki el a casi doble e cantidad di homerun (di 10 pa 23),  y a empuga 103 careda. E ta cuminsa e campaña 2019 como shortstop atrobe. Un dia prome, su mama Sandra Brown a firma un contract cu Aruba Tourism Authority pa un aña pa Bogaerts ta parti di e promocion pa Aruba. Un contracto balora na 200 mil dollar, di cual mitar ta bay pa Bogaerts mes y mitar ta bay pa su fundacion Dare to Dream Foundation cu ta asisti peloteronan hoben na Aruba. Bogaerts mes no tabata presente pasobra manera su mama a indica,e tabata den negosacion cu Red Sox pa su futuro. Y awe esaki a keda seya.