Parlamentarionan di Reino Hulandes convenci cu IPKO ta funciona bon

Parlamentarionan di Reino Hulandes convenci cu IPKO ta funciona bon

Posted on 01/11/2019 5:38 pm AST | Updated on 01/11/2019 6:24 pm AST

PHILLIPSBURG – E cuater delegacionan parlamentario cu e siman aki a participa na e reunionan interparlamentario di Reino Hulandes (IPKO) tabata satisfecho riba e logronan. Cada un di e lidernan di delegacion diabierna merdia a elogia e forma con e reunionan a bay. Algun rato tenso, pero en general un bon ambiente unda cu por a dialoga y te hasta na cierto momento, ta di acuerdo cu no ta di acuerdo riba cierto temanan. Na final a firma e lista di acuerdo cera durante e siman aki. 

LOGRONAN

Hulanda particularmente a keda impresiona cu e loke el a wak na St Maarten y con tur cos a desaroya sigur despues di un horcan cu a destrui gran parti di e isla, y pa e isla bounce bek te pa ta anfitrion di e reunionan e siman aki. Tur e lidernan di delegacion, incluyendo Paternotte di Hulanda a elogia e respet y forma con tur a trata otro, y Paternotte cu ta encarga cu e reunion na juni, a bisa cu e parlamentarionan ta invita pa ta presente den e reunionan di Tweede Kamer na juni, net prome cu e reunionan di IPKO tuma lugar, aunke (manera indica den un articulo anterior) nan no por vota (riba e tema e.o. di areglo di disputa). Presidente di IPKO e siman aki, cu tabata presidente di Parlamento di St Maarten, Sarah Wescott Williams tabata esun mas euforico cu tur, y orguyoso con IPKO a luci e siman aki y cu tur hende y isla a sali beneficia di e reunionan. Aruba y Corsou no a keda afor y a mustra cu nan ta sigui kere den IPKO, aunke cu tin cu ta pensa  cu no ta logra nada concreto y ta meramente ‘rek’ asuntonan di un reunion pa otro. 

TEMANAN TOCA 

Temanan toca entre otro ta e areglo di disputa, e situacion na Venezuela, e reconstruccion di St Maarten, cooperacion entre e islanan y Hulanda, e relacion di esaki, enseñansa y mas. Particularmente a dicidi cu lo usa e intercambio di informacion entre e paisnan di REino Hulandes, como forma pa keda informa y asina pone presion riba e respectivo gobiernonan pa yuda e islanan di Caribe Hulandes, particularmente Aruba y Corsou pa cu e problema di posibel influx di refugiado Venezolano. Lesa e relato completo y acuerdonan cera AKI. 

  • Aruba a firma tratado di douane Caribense na Cuba

    Aruba a firma tratado di douane Caribense na Cuba

    HAVANA – Diaranson Aruba tabata parti di e firmament di un tratao caribense di douana. E area Caribense pa un decennia ta un ruta di transporte di droga. Cu e paisnan cu a firma e Tratado di Douane di Caribe, nos por hunto combati traficacion di droga y fraude” asina e secretario di estado Hulandes di Finanza Menno Snel (D66) riba su twitter. Asina AD di Corsou ta raporta. E firmamento di a tratado a tuma lugar diaranson na Havana, capital di Cuba durante e di 41 conferencia annual di legislacion adouanero den Caribe. Aruba tabata representa pa minister Xiomara Maduro, y pa Corsou, minister Kenneth Gijsbertha. E islanan di Caribe Hulandes a firma esaki hunto cu 8 otro pais. Hunto nan ta firma e Caribbean Customs Organization (CCO). Fuente: Antiliaans Dagblad. Potret cortesia oficina di minister Kenneth Gijsbertha.

  • Parlamentario di St Maarten Theo Heiliger den libertad bao fiansa

    Parlamentario di St Maarten Theo Heiliger den libertad bao fiansa

    PHILIPSBURG – Parlamentario suspendi di Parlamento di St Maarten, Theodor Heyliger ta liber bou di fiansa. Laat diamars anochi el a recobra su libertad temporal di su predetencion, pagando un fiansa di 200 mil dollar, y e mester a entrega su pasaporte, e ora cu e mester biaha pa motibo medico. E tabata den hospital den weekend pa un operacion. Diamars atardi corte di apelacion a tende e caso di su detencion, y pa anochi a informa cu a dicidi di laga Heyliger liber debi na su situacion medico. Dialuna Heyliger a haci operacion di riñon, unda cu a detecta un tumor canceroso cu a wordo removi.   Heyliger a keda deteni dia 19 di februari ultimo na su cas na Guana Bay, como e sospechoso principal den e investigacion Larimar, riba corupcion. E caso ta programa pa cuminsa dialuna awor.  

  • Aruba den Vierlanden Bestuurlijk Overleg di Salud Publico na Bonaire

    Aruba den Vierlanden Bestuurlijk Overleg di Salud Publico na Bonaire

    KRALENDIJK - Diahuebs 16 di mei 2019 a tuma lugar e “Vierlanden Bestuurlijk Overleg” riba tereno di Salubridad Publico. E deliberacion aki ta un reunion cu anualmente ta ser teni entre e mandatarionan Minister Romer (Curacao), Minister Lee (St.Maarten), Staatssecretaris Blokhuis (Bonaire) y Minister Dangui Oduber (Aruba). Durante e reunion aki diferente palabracionnan ta wordo haci pa traha riba dje den e aña.

  • Parlamentario encarcela Heyliger transporta urgente pa hospital

    Parlamentario encarcela Heyliger transporta urgente pa hospital

    PHILIPSBURG – Parlamentario deteni y suspendi di St Maarten Theodore Heyliger a keda transporta cu urgencia pa hospital diahuebs pa un emergencia medico. E portal SMN News ta raporta cu Heyliger a wordo hiba hospital pa determina si mester haci un operacion urgente pa un infeccion di tracto urinario. Heyliger su situacion medico a empeora pasobra el a rechasa pa bay docter, pasobra e no tabata kier pa e guardianan di prison hibe den boei. SMN News ta cita fuentenan cu a mustra cu Ministerio Publico no kier a hiba Heyliger hospital pasobra e mester presenta den corte diabierna awor. Tambe ta mustra cu un docter cu a bishita Heyliger den hospital diaranson a bisa cu si e no haya tratamento medico, su bida por ta na peliger. Potret cortesia SMN News. 

  • Crisis Venezolano a sobresali na St Maarten durante reunion ‘KOBB’

    Crisis Venezolano a sobresali na St Maarten durante reunion ‘KOBB’

    ORANJESTAD – E tema di crisis na Venezuela tabata punto number uno riba agenda di e reunion di ‘Koninkrijk Overleg Buitenlandse Betrekkingen’ dialuna na St Maarten. Durante e reunion ey prome ministernan di Aruba, Corsou y St Maarten tabata presente hunto cu minister di Relacionan Exterior di Hulanda Stef Blok. Durante e reunion aki tur esnan presente a confirma cu e reunion tabata exitoso y cu palabracionan concreto y productivo a tuma lugar. 

  • ‘El Niño’ lo por prolonga secura pa nos region incluyendo Aruba

    ‘El Niño’ lo por prolonga secura pa nos region incluyendo Aruba

    BRIDGETOWN, Barbados (CMC) — E fenomeno di tempo ‘El Niño’ por percura pa un periodo di secura prolonga, y por afecta e temporada proximo di horcan den Caribe. Asina e instituto Caribense basa na Barbados, Caribbean Institute for Meteorology and Hydrology (CIMH) a bisa. El Niño ta hopi swak, y como tal tempo di secura lo sigui y haci e periodo entre temporada ‘seco’ y ‘muha’ mas largo. El Niño ta e fenomeno asosia cu un area di awa oceanico cayente cu ta desaroya den parti central Pacifico y ta un di e fenomeno mas importante cu ta produci tempo na mundo. Tin tambe fenomeno contrario conoci como 'La Niña', cu ta ora cu e mesun fenomeno ta mas friew. Segun pronostico di CIMH pa cu juni, secura severo of pio a desaroya na  Antigua, Aruba, Barbados, Curaçao, y Isla Riba. 

  • Powered by SETAR