Caribe Hulandes por ta presente den Tweede Kamer pero no pa vota

PHILLIPSBURG – Parlamentarionan di Caribe Hulandes por ta presente na Hulanda den Tweede Kamer pa tratamento di e concepto di ley pa e areglo di disputa (geschillenregeling), pero no por vota na final si. Asina lider di delegacion Hulandes di e reunionan interparlamentario di Reino Hulandes (IPKO), Jan Paternotte (D66)a bisa na clausura di e reunionan diabierna na St Maarten. E reunionan di Tweede Kamer ey ta programa un siman prome cu e reunion di IPKO na Hulanda den luna di juni di e aña aki. 

PARTICIPACION

Tabata durante e conferencia di prensa na clausura, cu a cuestiona e ‘importancia’ di IPKO y su impacto. Particularmente si pa 10 aña a trata e topico aki sin por a yega na un resolucion, y unda cu Hulanda finalmente tin e decision final. Por papia aki di e deficiencia democratico tambe. Prome, e presidente di parlamento di St Maarten y alavez esun cu a presidi IPKO e siman aki, Sarah Wescott Williams a bisa cu definitivamente IPKO tin su impacto, y cu e voznan di e islanan ta wordo resona y nan punto tuma den consideracion. Pero sigur, na final enberdad ta Tweede Kamer ta dicidi ora di vota riba e ley na Hulanda. Y cu durante e reunion na Hulanda unda cu lo trata esaki, lo tin posibilidad pa e parlamentarionan presenta mocion y cambionan, pero enberdad no por vota. Contestando otro pregunta riba e tema, a clarifica cu si unabez Hulanda bay di acuerdo cu e areglo di disputa, si esaki ta elimina e deficit democratico (Hulanda tin mas voto cu Caribe Hulandes), a contesta cu no, pasobra esaki ta un areglo riba cosnan specifico y ta cubri otro area y no e area di decisionan unda cu e deficit ta un problema. 

PODER DI IPKO

Paternotte a añadi cu si tin duda cu IPKO tin poder, a recorda cu aña pasa ta danki na presion di IPKO, cu gobierno Hulandes a traha e concepto di ley y cu esaki a keda presenta finalmente. Cu e contenido no ta conta cu sosten di e islanan (ainda), ta otro cos, pero por lo menos tin un ley riba mesa. E oportunidad awor ta grandi, y ta cuestion di e islanan di Caribe Hulandes ‘hunga nan wega bon’, pa ora cu tin votamento na Juni, cu nan impacto por wordo sinti. Mester pensa den union, paz y un bon relacion, versus confrontacion y pleito cu e Hulandesnan cu na final no ta yuda na nada. E siguiete reunion di IPKO ta tuma lugar na Den Haag, Hulanda entre 25 y 28 di juni, mientras cu e reunionan den Tweede Kamer riba e tema ta tuma lugar entrante dia 15 di juni proximo.