Ex Rio Grande Store basha abou diasabra mainta

NOORD - Un edificio considera como un monumento di Aruba, diasabra mainta a bay perdi ora cu contratistanan a benta esaki abou pa traha lugar pa un otro establecimento. Ta trata di e establecimento cu pa hopi aña a haya e nomber di Rio Grande. Despues durante dos campaña electoral, a bira e sede di un partido politico (partido AVP). Informacion cu NoticiaCla.com tin ta cu e intencion ta pa ubica un restaurant fastfood mericano na e sitio. Mientras cu esaki ta sosodiendo, NoticiaCla.com a compronde cu tabatin intentonan pa scapa e lugar aki, y tambe cu e doño nobo lo a priminti pa no deshaci di e parti historico di e edificio. No ta conoci si a cambia di idea of si a haci un fayo, cu a benta e edificio abou. Hecho ta cu e edificio completo a wordo benta abou diasabra mainta. 

Notable ta e ola di critica cu e acto aki a causa riba rednan social. Varios mensahe di critica severo a cay, cu ta varia di critica riba gobierno pa a permiti destruccion di un otro monumento, te na e comerciante cu a cumpra e edificio y a laga destrui esaki. Otronan a cuminsa pidi caba pa boycot e establecimento cu lo keda estableci na e sitio. NoticiaCla.com lo bin cu mas informacion. Fotos ta cortesia di dr prof. Ryan Peterson.