ATA a firma deal pa usa Xander Bogaerts pa promove Aruba

ORANJESTAD – Considera como un di e dealnan mas complica y largo pa cera, CEO di Aruba Tourism Authority Ronella TjinAsjoe a firma un deal cu presidente di Dare to Dream Foundation, Sandra Brown balora na 200 mil dollar. Esey ta duna ATA e derecho pa usa e pelotero profesional di Aruba Xander Bogaerts durante un aña pa metanan promocional di Aruba. Xander mes no tabata presente debi na otro compromiso (e mama a hint cu ta negoshando su deal cu Boston Red Sox pa e proximo temporada), Na comienso di april, e campaña usando e imagen di Xander lo ta riba Mercado internacional.  Mitar di e placa ta bay pa Xander Bogaerts y mitar ta bay pa e fundacion pa nan por sigui cu nan trabou di yuda future deportistanan local hoben. E produccion pa e material di promocion (video, potret y mas), lo cuminsa otro siman mes na Aruba cu Xander Bogaerts, y lo wordo usa internacionalmente riba diferente plataforma.

E DEAL

Contestando pregunta pa NoticiaCla, e hecho cu Bogaerts ta forma parti di organisacion di Major League Baseball, y como tal tin restriccion y obligacionan cu mester tene cuenta cune ora cu ta firma of trata cu un di e hungadornan professional. Den caso di Xander Bogaerts, esaki no tabata un excepcion. Mientras cu a negosha pa basta tempo, a keda cla porfin y cu por usa e imagen di Xander pa e fin promocional. Pero mester a tene cuenta cu un sin fin di rekisito y obligacionan, cumpliendo asina cu rekisito di MLB. Fuera di esey, tin e schedule super ocupa cu Xander mester tene su mes na dje pa su trabou. A traha lunas largo cu Red Sox y MLB, y cu Dare to Dream Foundation, cu for di 2013 ta yudando hobenan prominente crece den e mundo di baseball localmente. 

E SUMA

Mientras cu e suma cu ATA ta inverti den e proyecto aki ta zona hopi, TjinAsjoe a bisa cu e ta un suma relativamente abou, si tene na cuenta cu Bogaerts su balor ta mucho mas grandi cu esey. Pa pone den contexto, su mama Sandra Brown a splica cu pa dos ora di trabou so, pa por saca algun potret pa Instagram via un ‘endorsement’, ta paga Xander e suma di 75.000 dollar. Pues por compronde e ora cu 200.000 dollar pa por tin Xander disponibel, ta un ‘bon prijs’. Di otro banda, no mester kere cu Xander ta mes bon para cu hungadornan di pais bisiña manera Kenley Jansen y e ex pelotero Andruw Jones, pasobra nan ta gana hopi mas placa y ta na e forma cu nan por duna bek den un forma mas grandi. Xander awor a yega e status ey y dentro di algun tempo lo por haci esey.