Pa e Arubiano no ta asina cla cu nan ta bay bek despues di a studia na Hulanda

ORANJESTAD – Pa bai bek despues di bo estudio na Hulanda pa hopi Arubiano no ta asina claro. Pasobra no tin hopi trabou pa e hobennan asina bon educa na Aruba. Esaki ta sali tambe for di e relatonan di tres studiante Arubiano na Technische Universiteit (TU) Delft na un anochi di informacion djabierne pasa. Ey e futuro studiantenan na e isla por a tende con ta pa studia na universidad. E studiantenan di TU no ta comenta riba e conmocion cu a surgi ora a bin sali poco tempo pasa cu Leeuwarden kier tene Antiano sin oportunidad afo. I cu segun Leeuwarder Courant municipio a reserva placa pa yuda Antiano cu remigracion. E studiantenan ta bisa cu nan kier keda ‘neutral’ den e discucion aki pasobra durante di e anochi di informacion nan ta representa e Asociacion di studiante Antiano di Delft (ABC-compas) y TU-Delft.

NA ARUBA NO TIN ASINA TANTO CHÈNS – LYNRICK WIX

Pero nan ta reconose si cu baimento bek no ta algo claro. “Di tur manera mi tin idea pa bay Aruba bek un dia, pero bo mester sa bon ta kico ta e posibilidadnan”, studiante di tercer aña Lynrick Wix ta bisa. “Na Aruba no tin asina tanto chens pa haña trabou den bo specialisacion. Ta un problema cu mayoria di e Arubianonan ta topa.” Claudia Sweerts, prome aña Industrial Design Engineering, ta ripara esaki caba. E ta mira poco opcion na Aruba den su ramo di estudio i p’esey e no ta mira su mes bay bek dje lihe ey. Y Laura Croes, cu tambe ta studia Electrical Engineering, prome kier haña algun aña di conosemento y experencia den exterior.

BRAIN-DRAIN

Aruba tin añanan caba ta lucha cu un brain-drain; hoben Arubiano cu hopi talento ta cuminsa studia den exterior y despues no ta bini bek mas. Na 2011 a establece un ‘ley di lok’: si bo a caba di studia y bini bek den tres aña bo ta haña un rebaho di 30 porciento riba bo debe di estudio. Na 2017 a subi e porsentahe aki pa 35 porciento. Director Annemarie Proveyer di Directiva di Enseñansa hasta ta bisa cu a contempla pa si hobennan scohe un estudio den exterior caminda nan no por bini bek mesora, no duna nan un fiansa di Aruba mas. E fiansa di estudio ey hoben te 30 aña di edad por pidi si nan bay studia minimalmente na nivel di bachelor. Entre tanto e plan ey a para. E minister di enseñansa Arubiano tin como meta si pa percura pa mas educacion haltu na e isla, Proveyer ta bisa, via Universidad di Aruba y e educacion di docente IPA. E echo cu un estudio na Hulanda no ta duna bista riba un trabou na Aruba mesora, segun studiante Wix no mester influencia bo escoho di estudio. “Mi ta mira esaki socode rond di mi, y e no ta robes, pero no scohe un programa of estudio solamente pasobra bo kier bini Aruba bek. Bon, kisas bo no por bini bek cu e programa aki. Pero kisas bo gusta e estudio aki mas, y e ta cuadra mas ku bo”, asina e ta conseha e hobennan Arubiano.

Fuente: Ret Karibense Autor Bobby Spier