Entre 800 pa 900 cliente a busca nan plachi di auto riba prome dia

ORANJESTAD – Departamento di impuesto a procesa entre 800 pa 900 cliente cu a bin pa paga nan plachi di number riba e prome dia cu esaki tabata posibel. Mainta tempran tabatin rijnan relativamente largo cu a bay te pafo. A pone tent unda cu a kere cu tabatin mester, pero a resulta cu mester a pone mas. Director di impuesto Luenne Gomez Pieters a confirma cu a pidi caba pa mas tent, pa evita hende para den solo. En general tur cos a cana bon, aunke cu aki aya algun persona a cuminsa keha, sapatia, y pone cos riba Facebook y a yama minister pa keha. Mientrastanto, e volume di hende a baha y pa 5’or e edificio tabata blo bashi, siendo cu e departamento lo ta habri te 8’or di anochi non stop henter e dianan aki y diasabra te cu 6’or. Pues hendenan por a probecha di  bin atardi, y haci nan pago trankil. Manera ta conoci pa e proximo simanan lo tin un schedule pa esnan cu a paga delanta caba, pa duna nan e cortesia.