Fazio: Superweekend of no, check-in pa tur pasahero ta 3 ora prome cu buelo

ORANJESTAD - Si ta Super Weekend of no, e conseho di biahamento ta keda mescos: Tur pasahero mester ta na aeropuerto 3 ora prome cu e ora di salida di buelo pa evita cualkier inconveniencia. E comentario aki ta bin di e director di aeropeurto James Fazio. E ta referi na e ‘review’riba Trip Advisor. Aki ta unda cu aeropuerto a tuma nota di un post negativo riba Trip Advisor cu AAA ta haya lamentabel, unda un pasahero ta bisa cu a tard’e 4 ora y mei pa yega su buelo. Pa loke ta trata e review Fazio a bisa lo siguiente: “E experiencia di e pasahero pa nos ta di suma importancia y ta duel nos pa scucha cu un pasahero a perde su buelo na Aeropuerto di Aruba. For di e perspectiva di aeropuerto, nos a percura pa tin tur personanan clave na aeropuerto pa por garantisa un procesamento di pasahero mas eficiente posibel den e situacion extraordinario aki.” 

E KEHO TRIP ADVISOR

Manera cu NoticiaCla a raporta caba, como reaccion di aeropuerto e momento cu e comentario a surgi, nan a bisa mesora cu na ningun momento durante e fin di siman druk, tabatin condicionnan asina pa niun pasahero. AAA ta tuma tur feedback hopi na serio y inmediatamente a cuminsa cu investigacion pa haña sa kico a pasa, mirando cu e no a cuadra cu ningun observacion haci durante e fin di siman. E investigacion a mustra cu varios pasahero a perde e buelo cu ta wordo menciona pa motibo cu 30 minuut prome cu nan buelo nan a yega e prome punto di control prome cu drenta paden na imigracion, pues demasiado laat pa por subi nan buelo pa Merca.