Mota Engil ta nenga cu nan ta atrasa cu Watty Vos Blvd

ORANJESTAD – Mota Engil, pa straño cu por zona, ta nenga cu nan tin un ‘track record’ di retraso pa cu e proyecto di Watty Vos Blvd. No obstante e hecho cu te hasta e propio minister di infrastructura Otmar Oduber a ‘give up’ di duna deadline pasobra nan no ta cupmli toch, e persona encarga cu e proyecto, Joao Campos Forte a sigura NoticiaCla  e siman aki cu e ponencia cu nan tin e track record awor, no ta berdad. E compania no a cumpli cu varios deadline, y tabatin varios problema cu a causa tardansa, pa cual te hasta a impone un multa miyonario riba e compania. Asina mes pues, Campos ta sigura e portal aki cu nan no tin e ‘track record’ di ta laat. Loke segun Campos a pasa, ta cu tabatin varios situacion cu a sosode cu ta parti nan culpa y otro no, cu a conduci na cierto retraso. 

GARANTIANAN A VENCE

NoticiaCla a puntra cu ki garantia, mirando tur e ‘garantianan di tempo’ cu a duna di pasado pero cu a vence, cu pa augustus 2019, e proyecto completo incluyendo e prome parti (rotonde FCCA pa rotonde Cumana) ta keda cla. Campos a bisa cu no mester punta dede, pasobra ta un proceso cu cosnan cu por pasa den construccion. Entre un di e ultimatumanan tabata na mei aña pasa, cu a priminti cu pa augustus di 2018 lo a keda cla cu e prome parti. Esey no a logra. Despues a bisa cu esaki lo keda cla den September. Esey tampoco no a logra. Y finalmente e minister mes a ‘give up’ y a duna nan e multa miyonario y a bisa cu e proximo deadline ta esun di augustus 2019 ora cu e proyecto mester ta cla segun contract. Ta trata di entre otro e parti di inicio di e proyecto for di e rotonde di FCCA pa esun di Cumana, cu a conoce masha hopi ‘deadline’ cu nunca no a cumpli cu ne. 

DEADLINE AUGUSTUS

Segun Campos, ta trahando duro pa keda cla pa entrega e proyecto na augustus di 2019, manera cu e contracto ta cu nan a firma na 2017. “Si cos no ta cla, tin mechanismo na lugar pa esaki” Campos a bisa. “Si cualkier cos sosode cu nos no ta logra, mester atende cu esey ora cu e sosode. E por ta nos falta, e por ta otro partido, mi no sa. Aworaki no tin nada cu ta bisa nos cu nos no ta bay keda cla na augustus” Campos a bisa.